मुंबई - पोलीस निरीक्षक दया नायक यांच्या मार्गदर्शनाखाली अंबोलीत धडक कारवाई केल्यानंतर अमली पदार्थविरोधी पथकांनी मानखुर्द आणि कुर्ला, पवई परिसरात कारवाई करत गांजा व एमडीचा साठा जप्त केला. या कारवाईत 4 ड्रग्ज पेडलर्सच्या मुसक्या आवळल्या.
वरिष्ठांच्या सूचनेनुसार घाटकोपर युनिटचे सहाय्यक पोलीस निरीक्षक शिवडीकर, उपनिरीक्षक चारू चव्हाण आणि पथक मानखुर्द परिसरात गस्त घालत असताना पथकाला रामकृष्णा मूपनार (45) आणि अर्जुन विलास रेठे (34) या दोघांची हालचाल संशयास्पद वाटल्याने दोघांना ताब्यात घेण्यात आले. दोघांच्या अंगझडतीत 2 किलो 100 ग्रॅम वजनाचा गांजा सापडला. तर वरळी युनिटचे प्रभारी पोलीस निरीक्षक निनाद सावंत व त्यांच्या पथकाने कुर्ला एलबीएस मार्गावरील इंद्रा नगरात कारवाई केली. पोलिसांनी नफिस सुलेमान खान (49) हा ड्रग्ज पेडलरला 21 ग्रॅम वजनाच्या एमडीसह रंगेहाथ पकडले.
पवई येथील मोरारजी नगर परिसरात पोलिसांच्या रेकॉर्डवर असलेली गांजा विक्री करणारी महिला विक्रेती अजगरीबेगम सैयद अली (65) ही तिच्या घरासमोर असलेल्या प्लास्टिक पिशवीतून काहीतरी विक्री करत असताना पोलिसांना दिसली. त्यावेळी संशयास्पद हालचालीवरून पोलिसांनी तिच्या पिशवीची झडती घेतली असता तिच्याकडे व खाली लपविलेल्या पिशविमध्ये एकूण 2 किलो गांजा आढळून आला. तसेच २,३५,८३०/- रोख रक्कम पोलिसांना सापडली.