रांची - एका महिलेला विवस्त्र करून तिच्या गळ्यात चपलांचा हार घालून तिची गावातून धिंड काढण्यात आल्याची धक्कादायक घटना समोर आली आहे. झारखंडमधील दुमका जिल्ह्यातील रानिश्वर पोलीस ठाण्याच्या हद्दीत हा प्रकार घडला आहे. दरम्यान, पीडित महिलेच्या तक्रारीवरून दोन महिलांसह १२ जणांविरोधात गुन्हा दाखल करून सहा आरोपींना अटक करण्यात आल्याचे रानिश्वर पोलीस ठाण्याचे प्रभारी राजीव प्रकाश यांनी सांगितले. (The woman was stripped naked and taken around the village in Jharkhand)
पोलिसांनी दिलेल्या माहितीनुसार मसानजोर पोलीस ठाण्याच्या हद्दीत राहणाऱ्या एका महिलेचा विवाह रानिश्वरमधील एका गावातील माणिक मिर्धा याच्याशी झाला होता. दरम्यान, सहा महिन्यांपूर्वी माणिक आणि कुलुगू गावातील एका विवाहित महिलेमध्ये प्रेमसंबंध निर्माण झाले. त्यानंतर महिनाभरापूर्वी ही महिला माणिकसोबत पश्चिम बंगालमधील वर्धमान येथे निघून गेली.
दरम्यान, बुधवारी संध्याकाळी हे दोघेही कदमा गावात परत आले. त्यानंतर माणिकची पत्नी आणि घरातील अन्य व्यक्तींनी या महिलेला पकडले आणि तिला मारहाण केली. त्यानंतर तिला विवस्त्र करून तिच्या गळ्यात चपलांचा हार घालून तिची गावातून धिंड काढली. दरम्यान, ज्या १२ जणांविरोधात गुन्हा दाखल करण्यात आला आहे. ते सर्वजण माणिकचे कुटुंबीय असल्याचे पोलिसांनी सांगितले.
झारखंडमध्ये महिलांवरील अत्याचाराच्या घटना समोर येत असतात. याचवर्षी मार्च महिन्यामध्ये झारखंडमधील एखा पंचायतीने जमावासमोर एका महिलेला मारहाण केली होती. या मारहाणीमुळे मानसिक धक्का बसलेल्या पीडित महिलेने विषप्राशन करून आत्महत्या करण्याचा प्रयत्न केला होता.