नवी दिल्ली - बिहारच्या छपरामध्ये माणुसकीला काळीमा फासणारी घटना घडली आहे. क्रूरतेचा कळस पाहायला मिळाला आहे. एका महिलेवर बलात्कार करून तिची निर्घृण हत्या करण्यात आली आहे. निर्वस्त्र अवस्थेत तिचा मृतदेह सापडला आहे. धक्कादायक बाब म्हणजे महिलेच्या गळ्यावर, पोटावर, चेहऱ्यावर तब्बल 15 हून अधिक वेळा चाकूने हल्ला केल्यानंतर तिचे डोळे फोडण्यात आले आहेत. यामध्ये त्या महिलेचा मृत्यू झाला आहे. या घटनेने परिसरात एकच खळबळ उडाली आहे. पोलीस या प्रकरणाचा अधिक तपास करत आहेत.
मिळालेल्या माहितीनुसार, छपरा जिल्ह्यातील बनियापूर पोलीस ठाण्याच्या भागात ही भयंकर घटना आहे. एक 32 वर्षीय महिला आपल्या पतीसोबत याच गावात राहते. नेहमीप्रमाणे ती महिला बकऱ्यांसाठी चारा आणावा म्हणून जंगलात गेली होती. मात्र रात्र झाली तरी महिला घरी न आल्याने कुटुंबीयांनी शोधाशोध सुरू केली. खूप वेळ शोध घेतल्यानंतर गावाच्या बाहेर असलेल्या झुडपात महिलेचा निर्वस्त्र अवस्थेत मृतदेह आढळून आला. स्थानिक लोकांनी पोलिसांना माहिती दिली. पोलीस घटनास्थळी दाखल झाल्यावर मृतदेहाची स्थिती पाहून त्यांना देखील मोठा धक्काच बसला.
महिलेवर 15 हून अधिक वेळा चाकूने अनेक वार करण्यात आले आणि नंतर तिचे डोळेही फोडण्यात आले होते. मृतदेह हा शवविच्छेदनासाठी पाठवण्यात आला आहे. पोलीस घटनास्थळी पोहोचले तेव्हा स्थानिकांनी तीव्र विरोध केला. लोकांनी सांगितले की जोपर्यंत मारेकरी पकडले जात नाहीत, तोपर्यंत मृतदेह तेथून उचलू दिला जाणार नाही. वरिष्ठ अधिकारी घटनास्थळी पोहचल्यावर त्यांनी गावकऱ्यांना समजावलं आणि मृतदेह शवविच्छेदनासाठी पाठवला. पोलीस या प्रकरणाचा अत्यंत वेगाने तपास करत आहेत. एका हिंदी वेबसाईटने याबाबतचे वृत्त दिले आहे.
संतापजनक! आजोबांनी केलं लैंगिक शोषण; मदतीसाठी 'ती' भाऊ अन् काकाकडे गेली तर त्यांनीही केले अत्याचार
देशात बलात्काराच्या, महिलांवरील अत्याचाराच्या अनेक भयंकर घटना या सातत्याने समोर येत आहेत. अशीच एक नात्याला काळीमा फासणारी घटना घडली आहे. एका कुटुंबातील आजोबा, काका आणि भावाने चिमुकलीचं लैंगिक शोषण केल्याची संतापजनक घटना घडली आहे. धक्कादायक बाब म्हणजे रात्री झोपेत असताना आजोबांनी मुलीसोबत घृणास्पद कृत्य केलं. त्यानंतर मदतीसाठी काका आणि भावाकडे गेली असता त्या दोघांनी देखील अत्याचार केल्याचं समोर आलं आहे. तामिळनाडूमध्ये ही घटना घडल्याने परिसरात एकच खळबळ उडाली आहे. पोलिसांनी या प्रकरणात एका 62 वर्षीय व्यक्तीला अटक केली आहे. या व्यक्तीनो सात वर्षांच्या नातीचं लैंगिक शोषण केल्याचा गंभीर आरोप आहे.