नवी दिल्ली - उत्तर प्रदेशच्या हरदोईमध्ये एक धक्कादायक घटना घडली आहे. बंदुकीसोबत सेल्फी काढणं एका महिलेला चांगलंच महागात पडलं आहे. तिला आपला जीव गमवावा लागला आहे. मात्र धक्कादायक बाब म्हणजे मुलीच्या माहेरच्यांनी याबाबत मोठा खुलासा केला आहे. हुंड्यासाठी आपल्या मुलीचा प्रचंड छळ करण्यात आल्याचं म्हटलं आहे. तसेच दोन लाखांसाठी सासरची म़ंडळी तिला खूप त्रास देत असल्याचं सांगितलं आहे. पोलिसांनी मृतदेह ताब्यात घेतला असून पोस्टमार्टमसाठी पाठवला आहे. पोलीस या प्रकरणाचा अधिक तपास करत आहेत.
तरुणीचे वडील राकेश कुमार यांनी मुलीचा पती आकाश आणि सासू-सासरे यांच्या विरोधात हुंड्यासाठी 2 लाख रुपये मागून अत्याचार केल्याची तक्रार दाखल केली आहे. मिळालेल्या माहितीनुसार, आकाश गुप्ता याचं लग्न राधिका हिच्यासोबत दोन महिन्यांपूर्वी झालं होतं. साधारण 2 वाजेदरम्यान राधिका बंदुकीसह सेल्फी घेत असताना अचानक गोळी झाडली गेली आणि यात राधिकाचा मृत्यू झाला. यानंतर तातडीने कुटुंबीयांनी तिला रुग्णालयात नेलं. तेथे डॉक्टरांनी तिला मृत घोषित केलं. बंदुकीची गोळी राधिकाच्या गळ्याच्या आरपार गेली.
पोलिसांनाही या प्रकरणाची सूचना देण्यात आली. अधिक तपासासाठी पोलिसांनी राधिकाचा मोबाईल जप्त केला आहे. यानंतर राधिकाचे माहेरील मंडळीदेखील दाखल झाली. त्यांनी राधिकाच्या सासरच्या मंडळींवर तिच्या हत्येचा आरोप केला आहे. राधिकाच्या सासरची मंडळी 2 लाख रुपयांच्या हुंड्यासाठी तिच्यावर अत्याचार करीत होते. त्यामुळे त्यांनीच गोळी घालून तिची हत्या केल्याचा आरोप राधिकाच्या वडिलांनी केला आहे. पती-पत्नी बंदूक हातात धरून सेल्फी घेत असताना ही घटना घडली. एका हिंदी वेबसाईटने याबाबतचे वृत्त दिले आहे.
संतापजनक! जीन्स घालते म्हणून काकाने आणि आजोबांनी केली तरुणीची हत्या; अशी झाली पोलखोल
उत्तर प्रदेशच्या देवरियामध्ये नात्याला काळीमा फासणारी ही घटना घडली आहे. 17 वर्षीय तरुणीला तिच्या काकांनी आणि आजोबांनी जीन्स घालून नको असं वारंवार सांगितलं होतं. मात्र तिने त्याची ही गोष्ट ऐकण्यास नकार दिला. त्यामुळे संतापलेल्या या दोघांनी टोकाचं पाऊल उचलत तिची हत्या केली आहे. मुलीचे वडील लुधियानात नोकरी करत असल्यामुळे ही मुलगी आपल्या आईवडिलांसोबत शहरात राहत होती. मात्र सध्या कोरोनाकाळात हे कुटुंब गावी आलं होतं. शहराप्रमाणे गावात जीन्स घालून फिरण्याला मुलीच्या काकाचा विरोध होता. यावरून त्या मुलीमध्ये आणि काकामध्ये अऩेकदा वादही होत असे. हाच राग मनात ठेऊन काकाने आणि मुलीच्या आजोबांनी तिला बेदम मारहाण केली. दोघांनी केलेल्या मारहाणीदरम्यान भिंतीवर डोकं आपटून या मुलीचा मृत्यू झाला.