नवी दिल्ली - उत्तर प्रदेशच्या बाराबंकीमध्ये एक मन सुन्न करणारी घटना घडली आहे. रक्षाबंधनाच्या एक दिवस आधीच एका बहिणीने आपले दोन भाऊ गमावले आहेत. धक्कादायक बाब म्हणजे मामानेच आपल्या दोन चिमुकल्या भाचांची हत्या केल्याचं समोर आलं आहे. ज्या भावाला इतकी वर्ष राखी बांधली त्यानेच घात केला आणि बहिणीच्या दोन चिमुकल्या मुलांची हत्या केली आहे.
मिळालेल्या माहितीनुसार, फतेहपूर पोलीस ठाण्याच्या हद्दीतील बसारा गावात राहणाऱ्या रामकिशोर यांना दोन मुलं आहेत. सात वर्षांचा कृष्णा आणि पाच वर्षांचा दिव्यांश एका खासगी शाळेत शिकत होते. रामकिशोर यांची पत्नी कृष्णावतीचा भाऊ महेंद्र प्रताप हा दोन महिन्यांपासून आपल्या बहिणीकडेच राहत होता. तो आपल्या भाच्यांना शाळेत सोडायचा. घटनेच्या दिवशी देखील तो भाच्यांना शाळेत घेऊन जायला निघाला आणि त्यानंतर परत आलाच नाही.
रामकिशोर यांनी आपल्या मेहुण्याविरोधात मुलांचं अपहरण केल्याची तक्रार दाखल केली. यानंतर पोलिसांनी अधिक तपास केला असता. दोन मुलांचा मृतदेह कालव्यात आढळून आला आहे. पोलिसांनी कुटुंबियांना याबाबत सांगताच त्यांना मोठा धक्का बसला. या मुलांना एक मोठी बहीण देखील आहे. मुलं घरी परत न आल्याने ती आपले भाऊ घरी सुरक्षित परत यावेत म्हणून सतत प्रार्थना करत होती. पण तसं झालं नाही.
मुलांच्या आईने कधी विचारही केला नव्हता की ज्या भावाला गेल्या कित्येक वर्ष राखी बांधली तो आपल्याच मुलाचा असा प्रकारे जीव घेईल. या घटनेनंतर आरोपी फरार झाला असून पोलीस त्याचा शोध घेत आहेत. रक्षाबंधनाच्या आधीच अशी घटना घडल्याने कुटुंबीयांवर दु:खाचा डोंगर कोसळला आहे. पोलीस अधिक तपास करत असून या घटनेने परिसरात एकच खळबळ उडाली आहे. एका हिंदी वेबसाईटने याबाबतचे वृत्त दिले आहे.