लोकमत न्यूज नेटवर्क
मीरारोड - पैश्याच्या वादातून मामेभावानेच कोयत्याने हल्ला केल्या प्रकरणी भाईंदर पोलिसांनी गुन्हा दाखल केला आहे .
भाईंदरच्या मुर्धा गावातील डबका आळीत मयुर महादेव पाटील (३०) हे आई - वडील , भाऊ जयप्रकाश व त्याची पत्नी असे एकत्र राहतात . त्याच भागात मयूरचे मामा आत्माराम भोईर राहतात . मामाचा मुलगा दत्तप्रसाद याच्याशी पैश्यांच्या व्यव्हारा वरून जुना वाद आहे . शनिवारी मयूर जेवण करून बाहेर पडला असता दत्तप्रसाद हा पैश्याच्या जुन्या वादातून मयूरला शिवीगाळ करत ओरडू लागला .
काहीवेळाने तो कोयता घेऊन आला आणि मयूर व जयप्रकाशच्या अंगावर मारण्यासाठी धावून गेला . घाबरून सर्व घरात पळाले व आतून दार बंद केल्याने दत्तप्रसाद सर्वाना शिवीगाळ करू लागला आणि कोयत्याने दारावर मारू लागला . दत्तप्रसादची आई आली आणि त्याच्या हातातील कोयता काढून घेत त्याला घरी घेऊन गेली . मयूर याने शनिवारी फिर्याद दिल्यावर विविध कलमां खाली दत्तप्रसाद वर गुन्हा दाखल करण्यात आला आहे .