न्यायालयाने फेटाळला कुख्यात गँगस्टर छोटा राजनचा जामीन; व्हिडीओ कॉन्फरन्सिंगद्वारे सुनावणी

२०१५ मध्ये राजनचे विदेशातून भारतात प्रत्यार्पण करण्यात आल्यापासून त्याला तिहार कारागृहात ठेवण्यात आले आहे.

लोकमत न्यूज नेटवर्क, मुंबई: शस्त्रसाठा प्रकरणात मुंबईतील विशेष न्यायालयाने कुख्यात गँगस्टर छोटा राजनला जामीन नाकारला आहे. दरम्यान, राजन सध्या दिल्लीतील तिहार कारागृहात बंदिस्त आहे. छोटा राजनच्या टोळीतील भरत नेपाळीने मागवलेला पिस्तुल, रिव्हॉल्वर, काडतुसे, सायलन्सर, असा मोठा शस्त्रसाठा पोलिसांनी जप्त केला होता. या प्रकरणात राजनविरोधात सीमाशुल्क, भादंवि, शस्त्रास्त्र कायदा व मोक्का कायद्यान्वये गुन्हा नोंदवण्यात आला होता. 

हे प्रकरण अत्यंत गंभीर असून, यामध्ये साक्षीदारांची साक्ष नोंदविण्यात आल्या असून, खटला लवकरच संपण्याची शक्यता आहे, त्यामुळे जामीन मंजूर करता येणार नाही, असे स्पष्ट करत मुंबईतील सत्र न्यायालयातील विशेष न्यायाधीश ए.एम. पाटील यांनी छोटा राजनला जामीन देण्यास नकार दिला. २०१५ मध्ये राजनचे विदेशातून भारतात प्रत्यार्पण करण्यात आल्यापासून त्याला तिहार कारागृहात ठेवण्यात आले आहे. त्याच्याविरोधात दाखल असलेल्या विविध खटल्यांची सुनावणी सुरू आहे. मुंबईतील विशेष न्यायालयात खटल्यांच्या सुनावणीवेळी त्याला सुरक्षेच्या कारणास्तव व्हिडीओ कॉन्फरन्सिंगद्वारे हजर केले जाते.

सरकारी वकिलांचा विरोध

२०१५ मध्ये प्रत्यार्पण झाल्यापासून तुरुंगात असल्याने याप्रकरणी जामीन मिळावा, अशी मागणी राजनने याचिकेद्वारे केली होती. मात्र, विशेष सरकारी वकील प्रदीप घरत यांनी त्याच्या मागणीला विरोध केला. याप्रकरणी दोन्ही बाजूचा युक्तिवाद ऐकल्यानंतर न्यायालयाने त्याचा जामीन अर्ज फेटाळून लावला. या प्रकरणाची पुढील सुनावणी ९ जून रोजी ठेवण्यात आली आहे.