मीरारोड - मीरा भाईंदर महापालिकेच्या नालेसफाईच्या कामात ठेकेदाराने अल्पवयीन मजुरांना जुंपल्याने काशीमीरा पोलीस ठाण्यात या प्रकरणी ठेकेदारावर गुन्हा दाखल करण्यात आला आहे. पोलिसांनी ५ बालमजुरांना सुधारगृहात पाठवले आहे. परंतु पोलिसांनी मूळ ठेकेदार मालक व पालिका अधिकाऱ्यांना मात्र पाठीशी घातल्याने त्यांच्या भूमिकेबद्दल साशंकता व्यक्त होत आहे.
महापालिकेने नालेसफाईसाठी मे. एम. ई. प्रोजेक्ट ली. या कंपनीला नालेसफाई कामी यंत्र सामुग्री, वाहने व मजूर पुरवठा करण्याचे कंत्राट दिले आहे. मीरारोडच्या विनय नगर परिसरातील गटार साफ करण्यासाठी बालमजुरांना जुंपण्यात आल्याबाबत निदर्शनास आल्याने परिमंडळ १ चे पोलीस उपायुक्त अमित काळे यांनी अनैतिक मानवी वाहतूक शाखेस पडताळणी करून कारवाईचे आदेश दिले.
पोलिसांनी पडताळणी केली असता १६ ते १७ वयोगटातील ५ बालकामगार नालेसफाईचे काम करत असल्याचे आढळून आले. पोलिसांनी त्यांना बालसुधारगृहात पाठवले आहे. पोलिसांनी मनोज मयेकर व त्यांचे सुपर वायझर रमेश साहेबराव काळे (३५) यांच्यावर गुन्हा दाखल केला आहे. परंतु पोलिसांनी मे. एम. ई. प्रोजेक्ट ली. चे कंपनीच्या मूळ मालकाला व पालिकेच्या सार्वजनिक आरोग्य विभागांच्या अधिकाऱ्यांना आरोपी बनविले नाही.