प्रियकराने अबोला धरला; प्रेयसीने इमारतीवरून उडी मारत जीवनच संपवले

कंपनीत होती सेल्स एक्झिकेटिव्ह : मानकापुरात खळबळ

ठळक मुद्देपाचपावलीच्या जामदार वाडीत अंकिता राहत होती.अंकिता कृष्णराव माकोडे (२४) असे मृत तरुणीचे नाव आहे.

नागपूर : खासगी कंपनीत सेल्स एक्झिकेटिव्ह म्हणून कार्यरत असलेल्या एका तरुणीने बहुमजली इमारतीवरून उडी मारून आत्महत्या केली. मानकापूर पोलीस ठाण्याच्या हद्दीतील अ‍ॅलेक्सीस रुग्णालयाच्या मागच्या भागात मंगळवारी दुपारी ३ वाजताच्या सुमारास ही खळबळजनक घटना घडली. अंकिता कृष्णराव माकोडे (२४) असे मृत तरुणीचे नाव आहे. पाचपावलीच्या जामदार वाडीत अंकिता राहत होती.

नागपूर : प्रियकराने अबोला धरल्यामुळे निराश झालेल्या तरुणीची आत्महत्या, मानकापूर परिसरात घडली घटना https://t.co/CbvSFUB0GJ

— Lokmat (@MiLOKMAT) March 3, 2020

 

धक्कादायक! कर्जबाजारीपणाला कंटाळून कुटुंबीयांची सामूहिक आत्महत्या

 

मानकापूरातील एका कंपनीत ती चार महिन्यांपासून सेल्स एक्झिकेटिव्ह म्हणून कार्यरत होती. या कंपनीचे कार्यालय राज पॅलेस नामक बहुमजली इमारतीत आहे. नेहमीप्रमाणे ती आज कामावर आली. बराच वेळ ती प्रियकराशी मोबाईलवर बोलण्याचा प्रयत्न करीत होती. नंतर नैराश्येने दुपारी ३ च्या सुमारास ती चौथ्या मजल्यावर गेली आणि तेथून तिने खाली उडी मारली. डोक्याला जबर दुखापत झाल्याने अंकिताचा जागीच मृत्यू झाला.

दरम्यान, इमारतीवरून तरुणीने उडी मारल्याचे पाहून आजूबाजूच्यांनी एकच गर्दी केली. माहिती कळताच मानकापूरचे ठाणेदार वजिर शेख त्यांच्या सहकाऱ्यांसह तिकडे धावले. तोपर्यंत अंकितासोबत काम करणारे कार्यालयीन सहकारीही तेथे पोहचले. त्यांनी अंकिताची ओळख पटविल्यानंतर तिच्या पालकांशी संपर्क करून घटनेची माहिती देण्यात आली. दरम्यान, गर्दी वाढत असल्याचे पाहून पोलिसांनी अंकिताचा मृतदेह रुग्णालयात पाठविला. पोलीस अंकिताच्या आत्महत्येमागचे आणखी कारण जाणून घेण्याचा प्रयत्न करीत आहेत.