लहान भावाने मोठ्याचा केला कुऱ्हाडीने खून; फरारी आरोपीस जंगलातून अटक

आमगाव शिवपाडा येथील वसंत डोलारे तसेच राजेश डोलारे या शेजारी शेजारी राहणाऱ्या सख्ख्या भावांत जमिनीचा वाद असून त्यांच्यात नेहमीच भांडणे होत असत.

तलासरी : जमिनीच्या वादातून लहान भावानेच आपल्या मोठ्या भावाचा कुºहाडीने धाव घालून निर्घृण खून केल्याची घटना तालुक्यातील आमगाव शिवपाडा येथे शनिवारी रात्री आठ वाजेच्या दरम्यान घडली. खून करून जंगलात पळालेल्या आरोपी राजेश रूपजी डोलारे यास तलासरी पोलिसांनी रातोरात शोधून गजाआड केले.

आमगाव शिवपाडा येथील वसंत डोलारे तसेच राजेश डोलारे या शेजारी शेजारी राहणाऱ्या सख्ख्या भावांत जमिनीचा वाद असून त्यांच्यात नेहमीच भांडणे होत असत. शनिवारी रात्री मयत वसंत याची मुलगी आशा हिने आपला लहान भाऊ राहुल याची चेष्टा करून त्यास रडविले. यावेळी वसंत याने मुलगी आशा हिला राहुल हा तुला एकटाच भाऊ आहे. त्यास रडवू नको, असे समजावले. याच वेळी वसंत करीत असलेली बडबड आपल्याला उद्देशून आहे, असा समज राजेश याने करून घेतला व रागाने त्याने भाऊ वसंत यास घरातून बाहेर बोलावून घेतले आणि हातातील कुºहाडीने सपासप वार वसंतवर केले. यावेळी गंभीर जखमी झालेला वसंत जागीच ठार झाला. आपल्या हातून भावाचा खून झाला आहे, हे बघताच राजेश जंगलात पळून गेला.

घडलेल्या घटनेची महिती तलासरी पोलिसांना मिळताच पोलीस निरीक्षक अजय वसावे आपल्या कर्मचाऱ्यांसह घटनास्थळी जाऊन तपास करून रातोरात जंगलात लपलेल्या राजेशला शोधून काढून गजाआड केले. या घटनेमुळे सर्वत्र खळबळ उडाली आहे. मयताची पत्नी मीना वसंत डोलारे हिच्या तक्रारीवरून आमगाव शिवपाडा येथे गुन्हा दाखल करण्यात आला आहे.