औरंगाबाद : कांचनावाडी परिसरातील नक्षत्रापार्क येथे एका 18 वर्षाच्या तरुणाचे डोकं ठेचून त्याचा खून करण्यात आल्याची घटना रविवारी रात्री घडली. याघटनेची माहिती मिळताच सातारा पोलिसांनी घटनास्थळी धाव घेतली. महेश दिगंबर काकडे (वय-18 ,रा नक्षत्रापार्क) असे मयताचे नाव. महेश हा गेल्या काही महिन्यांपूर्वी कांचनवाडीयेथील हॉटेल तरंगमध्ये वेटर म्हणून कामाला होता.
महेशने महिनाभरापूर्वीच काम सोडले आणि तो कंपनीत कामाला जाऊ लागला होता. शनिवारी त्याला वेतन मिळाले होते, तो आणि त्याचा तरंग हॉटेलमध्ये वेटर असलेला मित्र राहुल देविदास बेडके यांनी दिवसभर दारू पिली. त्यानंतर रात्री उशिरा त्यांच्यामध्ये काहीतरी कारणावरून भांडण झाले. यातूनच त्यांच्यामध्ये हाणामारी झाली. यावेळी गंभीर जखमी झालेल्या महेशला सोडून राहुल हॉटेलमध्ये कामावर परतला.
दरम्यान तेथील एका गॅरेज चालकाने ही बाब महेशचे वडील दिगंबर काकडे यांना फोन करून कळविली. त्यानंतर काकडे हे हॉटेल तरंग येथे गेले. तेथे त्यांनी महेश कुठे अशी राहुलकडे विचारणा केली असता महेश परिसरातील एका ठिकाणी झोपला असल्याचे तो म्हणाला. त्यानंतर हॉटेल चालक गणेशशेठ आणि दिगंबर काकडे यांनी राहुलला सोबत घेऊन ते महेश झोपलेल्या ठिकाणी गेले, तेव्हा महेश रक्ताच्या थारोळ्यात निपचित पडलेला होता. त्यांनी त्याला घाटी रुग्णालयात दाखल केले असता रात्री पावणे बारा वाजेच्या सुमारास त्याचा मृत्यू झाल्याचे डॉक्टरांनी सांगितले.
दरम्यान, या घटनेची माहिती मिळताच सातारा पोलिसांनी घाटी रुग्णालय आणि घटनास्थळी धाव घेतली. महेशचा खून कोणी आणि कोणत्या शस्त्राने केला? खुनाचे कारण? काय याबाबतची माहिती रात्री उशिरापर्यंत समोर आली नव्हती.