Alwar Murder News: प्रियकरासोबत पतीच्या हत्येचा कट रचला. त्यानंतर दोन लाखांत पतीच्या हत्येची सुपारी दिली. घरीच त्या लोकांना बोलावले आणि नजरेसमोरच पतीची हत्या केली. पण, कुणालाही संशय येऊ नये म्हणून दुसऱ्या दिवशी पतीचा मृत्यूने आपण हादरलो असल्याचे दाखवण्यासाठी आक्रोशही केला. हत्या लपवण्याचा प्रयत्न झाला, पण सत्य समोर आलंच! ही घटना घडली आहे राजस्थानातील अलवर जिल्ह्यात. प्रेमसंबंधात अडथळा ठरत असलेल्या पतीची हत्या करणाऱ्या महिलेचे खरे रुप तिच्याच मुलाने समोर आणले. हत्येचा सगळा घटनाक्रम ऐकल्यानंतर पोलीसही चक्रावून गेले.
लोकमत'चं WhatsApp चॅनल फॉलो करा!
सोनम रघुवंशीने जशी पतीची हत्या केली, तशीच घटना राजस्थानात घडली आहे. महिलेने प्रियकरासोबत मिळून पतीची हत्या केली. अलवर जिल्ह्यातील खेडलीमध्ये एका महिलेने दोन लाखात पतीच्या हत्येची सुपारी दिली. प्रियकराच्या मदतीने पतीची हत्या केली. त्यानंतर सकाळी रडारड करू लागली. पण, ९ वर्षाच्या मुलाने आईने केलेल्या हत्येचा सगळा घटनाक्रम सांगितला आणि पोलीसही हादरले. ९ वर्षाच्या मुलामुळे हत्येच्या प्रकरणाला वाच्या फुटली.
मम्मीने दरवाजा उघडला, हत्या होत असताना मम्मी बघत होती
महिलेच्या ९ वर्षाच्या मुलाने सांगितले की, "मी झोपेत होतो. त्याचवेळी दरवाजाजवळून हळू आवाजात बोलत असल्याचे ऐकायला आले. मी डोळे उघडले, तेव्हा बघितले मम्मीने दरवाजा उघडला. बाहेर काशी काका उभे होते. त्यांच्यासोबत चार लोक होते."
वाचा >>चक्की चालवणारे सोनमचे बाबा कसे झाले करोडपती? कमाई एवढी की नातेवाईकांच्या नावावर खाती
"मी उठलो. मम्मी बाजूला उभी होती. पप्पाला त्या लोकांनी पकडून ठेवले होते. त्यांच्या तोंडावर मारले. त्यांचे पाय पिरगळे आणि नंतर गळा दाबला. काशी काकाने उशीने पप्पाचे तोंड दाबून ठेवलेले होते', असे नऊ वर्षाच्या मुलाने पोलिसांना सांगितले.
दोन लाखात दिली पतीची सुपारी
पोलिसांनी हत्ये प्रकरणात मयत व्यक्तीची पत्नी अनिता, तिचा प्रियकर आणि इतर तरुणांना अटक केली. मयत व्यक्तीचे नाव वीरू असे आहे. त्याला पत्नीचे काशीसोबत विवाहबाह्य संबंध असल्याचे कळले. त्यावरून दोघांमध्ये वाद होऊ लागला. अनिताने प्रियकरासोबत मिळून त्याचा काटा काढण्याचे ठरवले.
वीरूचा मृतदेह मिळाल्यानंतर त्याच्या भावाने अनितावर हत्येचा आरोप केला होता. १५० पेक्षा जास्त सीसीटीव्ही कॅमेऱ्यातील फुटेज पोलिसांनी तपासले. इतर माहितीही मिळवली. त्यातून अनितानेच प्रियकर आणि भाड्याच्या गुंडाकरवी पतीची हत्या केल्याचे समोर आले. त्यासाठी गुंडांना दोन लाखांची सुपारी देण्यात आली होती.