१५ राज्ये, अनेक बँका अन् ओटीपीशिवाय खात्यातून काढले २९ कोटी; ६ आरोपींचे हादरवणारे कृत्य

गुजरातमध्ये १५ राज्यांमधील बँक खात्यांमधून २९ कोटी रुपयांचा घोटाळा करणाऱ्या सहा आरोपींनी अटक करण्यात आली.

Ahmedabad Cyber Crime: गुजरातमध्ये अहमदाबाद पोलिसांनी एका मोठ्या सायबर फसवणुकीचा पर्दाफाश केला आहे. आरोपींनी वन-टाइम पासवर्ड न वापरता १५ राज्यांमधील बँक खात्यांमधून २९ कोटी रुपयांहून अधिक रक्कम काढून घेण्यात आली. अहमदाबादच्या पालदी परिसरात सायबर फसवणुकीचा हा धक्कादायक प्रकार समोर आला आहे. तक्रारदाराच्या बँक खात्यातून ओटीपीशिवाय २५ हजार रुपये काढण्यात आल्यानंतर पोलिसांनी या प्रकरणाची चौकशी केली. तपासादरम्यान सायबर फसवणुकीचा प्रकार समोर आला, ज्यामुळे सर्वांनाच धक्का बसला.

या प्रकरणाच्या तपासादरम्यान, पोलिसांना १५ राज्यांमधील वेगवेगळ्या लोकांच्या बँक खात्यांमधून २९ कोटी रुपयांची फसवणूक झाल्याचे समोर आलं. या प्रकरणाचा खुलासा करत पालदी पोलिसांनी ६ आरोपींना अटक केली आहे. यासोबतच, आरोपींच्या ताब्यातून ३.१६ कोटी रुपयांची रोकडही जप्त करण्यात आली आहे. पालदी पोलिसांनी सांगितले की, या घोटाळ्यात ओटीपीशिवाय सायबर फसवणूक करण्यात आली. अहमदाबादमधील एका व्यावसायिकाच्या खात्यातून ओटीपीशिवाय २५ हजार रुपये काढण्यात आले होते. ८ ऑगस्ट रोजी या व्यक्तीने दाखल केलेल्या २४९८८ रुपयांच्या सायबर फसवणुकीच्या तक्रारीच्या आधारे पोलिसांनी कारवाई केली.

अटक केलेल्या सायबर आरोपींमध्ये अश्विन पटेल, स्मित चावडा, राकेश प्रजापती, जगदीश पटेल, जास्मिन खंभायता आणि आरिफ मकरानी अशी नावे आहेत. हे सर्व आरोपी सायबर गुन्ह्यात सहभागी असल्याचे आढळून आले आहे. ही टोळी बँकेतून रोख रक्कम घेत असे आणि कमिशन घेतल्यानंतर ते आरोपींना देत असे. सध्या पोलिसांनी ३.१७ कोटी रुपये रोख, १५ मोबाईल, तीन चेक आणि ९ चेकबुक जप्त केले आहेत. ही टोळी बँकेतून रोख रक्कम घेत असे आणि कमिशन घेतल्यानंतर ते आरोपींना द्यायची.

या टोळीने आतापर्यंत एकूण २९ कोटी रुपयांचा व्यवहार केला आहे. १५ राज्यांमधील लोक या फसवणुकीचे बळी ठरले आहेत. प्रत्येक बँक खात्याच्या तपासणीदरम्यान ५०० हून अधिक तक्रारी प्राप्त झाल्या आहेत. तपासादरम्यान आढळून आले की वेगवेगळ्या खात्यांमध्ये ९ कोटी रुपयांपेक्षा जास्त रक्कम जमा करण्यात आली आहे.

पोलिसांनी २५,००० रुपयांच्या व्यवहाराची चौकशी केली तेव्हा असे आढळून आले की ही रक्कम तीन वेगवेगळ्या पातळ्यांवर हस्तांतरित करण्यात आली होती. तिसऱ्या पातळीवर ही रक्कम युनियन बँकेच्या ड्राइव्ह-इन रोड शाखेतील दोन खात्यांमध्ये जमा करण्यात आली होती. या खात्यांमधून सेल्फ-चेकद्वारे लाखो रुपये नियमितपणे काढले जात होते. पोलिसांनी बँकेतून पैसे काढण्यासाठी आलेल्या सहा जणांना ताब्यात घेतले आणि त्यांच्याकडून ३.१६ कोटी रुपयांची रोकड जप्त केली. या दोन्ही बँक खात्यांमधून चेकद्वारे तीन कोटी १८ लाख रुपये काढण्यात आले आहेत. बँक खात्यात इतकी मोठी रक्कम जमा झाल्याबद्दल आणि नंतर ती काढण्याबद्दल शंका आल्याने पोलिसांनी खातेदारांना बोलावून त्यांची चौकशी केली. त्यांच्या खात्यात इतकी मोठी रक्कम कशी जमा झाली, ती कोणी जमा केली आणि त्यांनी ती का काढली याबद्दल समाधानकारक उत्तरे त्यांना देता आली नाहीत.

आरोपी फसवणुकीची रक्कम सेल्फ-चेकद्वारे काढत असत आणि ती हवालाद्वारे वेगवेगळ्या शहरांमध्ये पाठवत असत. त्यानंतर ती क्रिप्टोकरन्सी ब्लॉकचेनमध्ये ट्रान्सफर करत असत. या रॅकेटने एकूण २३.२३ कोटींचा व्यवहार केल्याचे पोलिसांना आढळून आले. बँकांनी खाती उघडण्याचे नियम योग्यरित्या पाळले नाहीत त्यामुळे अशा फसवणुकी वाढत आहेत असे पोलिसांचे मत आहे. आरबीआयच्या नियमांनुसार, अचानक मोठ्या रकमेचे व्यवहार झाल्यास, बँकेने खातेधारकाची चौकशी करावी आणि आरबीआयला संशयास्पद व्यवहार अहवाल द्यायला हवा.