आदिवासी युवकांच्या मृत्यूनंतर पोलीस आक्रमक, आरोपीच्या घरावर बुलडोझर फिरला

मुख्य आरोपीचं घर जमीनदोस्त करण्यात आलंय. तर, सहआरोपी अमरचंद याचेही घर तोडण्यात आले आहे. याप्रकरणातील प्रमुख आरोपी महेंद्र गुर्जर याची पत्नी गावची सरपंच आहे.

ठळक मुद्देनीमच जिल्ह्यातील सिंगोली पोलीस ठाण्याच्या हद्दीत कन्हैय्या भील नावाच्या आदिवासी युवकाबाबत ही घटना घडली होती. आरोपींनी पहिल्यांदा युवकाला बाईकनं टक्कर मारली.

भोपाळ - मध्य प्रदेशातील नीमच इथं माणुसकीला काळीमा फासणारी भयानक घटना घडली. येथील एका गरीब आदिवासी युवकाला काही टवाळखोरांनी उघडपणे पिकअप वाहनाच्या मागे बांधून फरफटत नेलं. या घटनेत ८ जणांना आरोपी करण्यात आले आहे. यातील ४ जणांच्या पोलिसांनी मुसक्या आवळल्या आहेत. ज्यात मुख्य आरोपीचाही समावेश आहे. याप्रकरणात पोलिसांनी मुख्य आरोपीच्या घरावर बुलडोझर फिरवला आहे. 

नीमच जिल्ह्यातील सिंगोली पोलीस ठाण्याच्या हद्दीत कन्हैय्या भील नावाच्या आदिवासी युवकाबाबत ही घटना घडली होती. आरोपींनी पहिल्यांदा युवकाला बाईकनं टक्कर मारली. त्यानंतर आदिवासी युवक भील याला बांधून ओढत मारहाण केली. या युवकाचा उपचारादरम्यान मृत्यू झाला आहे. २६ ऑगस्टला ही निर्दयी घटना घडल्याचं सांगितलं जात आहे. ज्याचा व्हिडीओ सध्या सोशल मीडियात व्हायरल झाला आहे. त्यानंतर, पोलिसांनी कारवाई करत 4 आरोपींना अटक केली आहे. त्यातील, मुख्य आरोपीचं घर जमीनदोस्त करण्यात आलंय. तर, सहआरोपी अमरचंद याचेही घर तोडण्यात आले आहे. याप्रकरणातील प्रमुख आरोपी महेंद्र गुर्जर याची पत्नी गावची सरपंच आहे. पोलिसांनी आरोपींविरुद्ध हत्यासह इतरही गुन्हे दाखल केले आहेत. 

प्रमुख आरोपींना अटक 

नीमच घटनेबाबत एसपी सूरज कुमार वर्मा यांनी माहिती दिली की, या घडलेल्या घटनेनंतर ८ जणांना आरोपी बनवण्यात आले आहेत. ज्यात प्रमुख आरोपी छीतरमल गुर्जर, महेंद्र गुर्जर यांना पोलिसांनी अटक केली आहे. पिकअप गाडी चालक आणि सहचालकालाही पोलिसांनी बेड्या ठोकल्या आहेत. सध्या पोलीस या घटनेची चौकशी करत असून बाकी आरोपींनाही लवकरात लवकर पकडलं जाईल असं पोलिसांनी सांगितले आहे.

काँग्रेसनं साधला निशाणा

मध्य प्रदेशचे माजी मुख्यमंत्री कमलनाथ यांनी या घटनेबाबत ट्विट करत म्हटलंय की, मध्य प्रदेशात हे काय चाललंय? नीमच जिल्ह्यात आदिवासी युवकाला बेदम मारहाण केली जाते. चोरीच्या संशयावरुन त्याला इतकं निर्दयी मारहाण करून एका वाहनाच्या सहाय्याने ओढत नेलं जातं. त्यात या युवकाचा मृत्यू होतो. मानवतेला काळीमा फासणारी ही घटना असून यामुळे राज्यात दहशतीचं वातावरण तयार झालं आहे. लोकं बिनधास्तपणे कायदा हातात घेत आहेत. कायद्याची भीती उरली नाही. सरकार नावाची गोष्टही दिसून येत नाही. अशा घटनांना तात्काळ रोखलं पाहिजे. दोषींवर कडक कारवाई करण्यात यावी आणि राज्यात कायदा-सुव्यवस्था अबाधित राखावा अशी मागणी त्यांनी केली. दरम्यान, काँग्रेसनं या घटनेच्या चौकशीसाठी समिती बनवली आहे.