Rape case news: नऊ वर्षांची मुलगी. ती बर्फ घेऊन आजीच्या घराकडे गेली होती. पण, बराच वेळ उलटला तरी घरी आलीच नाही. मग शोधाशोध सुरू झाली. त्यावेळी कळलं की ती घरातून निघाली, पण आजीच्या घरी पोहोचलीच नाही. मग कळलं की, काही लहान मुलांनी तिला एका फ्लॅटमध्ये जाताना बघितलं. त्यानंतर जे समोर आलं, ते धक्कादायक होतं. मुलगी एका सुटकेसमध्ये अर्धनग्न अवस्थेत आणि बेशुद्ध पडलेली होती.
'लोकमत'चं WhatsApp चॅनल फॉलो करा!
ही घटना घडली ती दिल्लीतील नेहरू विहार भागात. शनिवारी रात्री नऊ वर्षाची मुलगी एका फ्लॅटमधील सुटकेसमध्ये बेशुद्धावस्थेत आढळून आली. तिच्यावर बलात्कार करून हत्या करण्याचा प्रयत्न केल्याचा आरोप तिच्या आईवडिलांनी केला.
रुग्णालयात पोहोचण्यापूर्वीच गेला जीव
पोलिसांनी सांगितले की, मुलीचे वडील तिला रुग्णालयात घेऊन चालले होते. त्यावेळी ती बेशुद्धावस्थेत होती. पण, रुग्णालयात पोहोचण्यापूर्वीच तिने प्राण सोडला. रस्त्यातच तिचा मृत्यू झाला. पीडित मुलीच्या आईवडिलांनी कॉलनीमध्ये राहणाऱ्या नौशाद नावाच्या व्यक्तीने बलात्कार केल्याचा आरोप केला आहे. संशयित आरोपी घटना घडल्यापासून फरार आहे.
फ्लॅटमध्ये जाताना दिसली मुलगी
मिळालेल्या माहितीनुसार, मुलगी तिच्या आजीच्या घरी बर्फ द्यायला गेली होती. पण ती तिकडे पोहोचलीच नाही. शोध घेत असताना काही लहान मुलांनी ती कॉलनीमधीलच एका फ्लॅटमध्ये जाताना दिसल्याचे सांगितले.
वाचा >>सोनम-राजाचा पाठलाग करत होती 'लाल' कार? नव्या CCTV फुटेजमध्ये दिसली संशयास्पद हालचाल
जेव्हा मुलीचे आईवडील आणि नातेवाईक त्या फ्लॅटकडे गेले, तेव्हा दरवाजाला कुलूप लावलेलं होतं. त्यामुळे त्यांनी कुलूप तोडलं आणि घरात प्रवेश केला.
सुटकेसमधून ठिपकत होते रक्त
घरात प्रवेश केल्यानंतर त्यांना एक सुटकेस दिसली. त्यातून रक्त ठिपकत होते. त्यांनी ती सुटकेस उघडली, ज्यात नऊ वर्षाची मुलगी बेशुद्धावस्थेत पडलेली होती. ते लगेच तिला रुग्णालयात घेऊन निघाले, पण रस्त्यातच तिचा मृत्यू झाला.
पोलिसांनी पोक्सो कायद्यानुसार गुन्हा दाखल केला आहे. पोलिसांनी संशयित आरोपीचा शोध सुरू केला असून, दिल्ली आणि दिल्लीला लागून असलेल्या उत्तर प्रदेशातील काही ठिकाणांवर धाडीही टाकल्या. पोलिसांनी आरोपीच्या भावाला ताब्यात घेतले आहे.
ज्या फ्लॅटमध्ये सुटकेसमध्ये मुलगी आढळून आली, त्याच फ्लॅटमध्ये नौशाद राहतो. तो बिर्याणी विकतो. त्याची पत्नी माहेरी गेलेली आहे. त्यामुळे घरी तो एकटाच होता. दिल्ली पोलिसांचे सहा पथके सध्या आरोपीचा शोध घेत आहेत.