लखनऊ :उत्तर प्रदेशातील प्रयागराजमध्ये एकाच कुटुंबातील चार जणांची हत्या करण्यात आल्याची धक्कादायक घटना घडली आहे. मृतांमध्ये 16 वर्षीय मुलगी आणि तिच्या 10 वर्षीय भावाचा समावेश आहे. गुरुवारी पहाटे चोरट्यांनी ही हत्या केली. दरम्यान, नातेवाईकांनी मुलीची हत्या करण्यापूर्वी तिच्यावर बलात्कार झाल्याचा दावा केला आहे.
आई-वडील आणि मुले, अशा चौघांची निर्घृणपणे हत्या झाली आहे. याप्रकरणी पोलिसांनी सामूहिक बलात्कार आणि हत्येसह इतर कलमांतर्गत 11 नामांकित लोकांविरुद्ध एफआयआर दाखल केला आहे. नातेवाईकांनी शेजारी राहणाऱ्या उच्च जातीच्या कुटुंबावर हत्येचा आरोप केलाय. दरम्यान, पोलिसांनी काही लोकांनाही चौकशीसाठी ताब्यात घेतलंय. काँग्रेस नेत्या प्रियांका गांधी वाड्रा मृतांच्या कुटुंबीयांची भेट घेऊ शकतात.
पोलिसांनी दिलेल्या माहितीनुसार, मृतांच्या शरीरावर कुऱ्हाडीचे घाव घातलेल्या गंभीर जखमांच्या खुणा आहेत. तसेच, मुलीचा मृतदेह घरातील एका खोलीत आणि इतर तीन मृतदेह अंगणात एकत्र आढळून आले आहेत. पीडित कुटुंबातील एका सदस्याने मीडियाला सांगितले की, मृत कुटुंबाचा शेजारच्या उच्च जातीच्या कुटुंबाशी 2019 पासून जमिनीचा वाद सुरू होता. 2019 मध्येही त्या कुटुंबाकडून हल्ला झाला होता, पण तेव्हा तो वाद मिटवण्यात आला. आता त्या अँगलने पोलिसांनी तपास सुरू केला आहे.