छत्रपती संभाजीनगराचा महापाैर कोण? भाजपमध्ये स्पर्धा जोरात; राजूरकर, औताडे, वानखेडे चर्चेत

आरक्षण जाहीर होताच भाजपमध्ये वेगवान घडामोडींना सुरुवात झाली.

छत्रपती संभाजीनगर : शहराचे प्रथम नागरिक म्हणजेच महापौरपदी कोण विराजमान होणार, याकडे सर्वांचे लक्ष लागले आहे. मुंबईत गुरुवारी महापौर सोडतीचे आरक्षण काढण्यात आले. त्यात छत्रपती संभाजीनगरचे महापौरपद खुले (सर्वसाधारण) आहे. आरक्षण जाहीर होताच भाजपमध्ये वेगवान घडामोडींना सुरुवात झाली. दुसऱ्यांदा नगरसेवक म्हणून निवडून आलेले समर्थनगर प्रभागाचे समीर राजूरकर, मयुरपार्क प्रभागाचे विजय औताडे आणि तिसऱ्यांदा निवडून आलेले एन-११-रोजबाग प्रभागाचे राजगौरव वानखेडे या पदासाठी स्पर्धेत आहेत.

महापालिका निवडणुकीत भाजपचे सर्वाधिक ५७ उमेदवार निवडून आले. बहुमतासाठी भाजपला ५८ मतांची गरज आहे. विभागीय आयुक्तांकडे गट स्थापन करताना यामध्ये आणखी किती नगरसेवक भाजपसोबत येतात, यावर पुढील राजकीय गणित अवलंबून आहे. महापालिकेच्या इतिहासात पहिल्यांदाच एखाद्या पक्षाला मतदारांनी बहुमताजवळ नेऊन ठेवले आहे. यापूर्वीच्या सहा निवडणुकांमध्ये त्रिशंकू अवस्था राहिली. महापौरपदाच्या निवडणुकीसाठी शुक्रवारी महापालिका प्रशासन विभागीय आयुक्तांना पत्र पाठविणार आहे. विभागीय आयुक्त पीठासन अधिकाऱ्यांची नेमणूक करतील. त्यानंतर महापालिका प्रशासन निवडणूक कार्यक्रम निश्चित करणार आहे. फेब्रुवारी महिन्याच्या दुसऱ्या आठवड्यात महापौर निवडणुकीसाठी सभा घेण्यात येईल, अशी माहिती मनपातील सुत्रांनी दिली.

छत्रपती संभाजीनगरचे महापौरपद सोडतीत खुले (सर्वसाधारण) आहे. दुपारी १२:४५ वाजता आरक्षणाची घोषणा होताच शहरात इच्छुकांनी एकच जल्लोष केला. भाजपमध्ये इच्छुकांनी जोरदार फिल्डिंग लावायला सुरुवात केली.

सर्वसाधारण प्रवर्गातील यापूर्वीचे महापौरगजानन बारवाल (१८-४-१९९६ ते ७-५-१९९७),सुदाम सोनवणे (२०-४-१९९९- ते २९-४-२०००),किशनचंद तनवाणी (२९-४-२००५ ते ४-११-२००६),विजया रहाटकर (२९-१०-२००७ ते २८-४-२०१०),त्र्यंबक तुपे (२९-४-२०१५ ते ३०-११-२०१६)भगवान घडमोडे (१४-१२-२०१६ ते २८-१०-२०१७).

महापालिकेतील पक्षीय बलाबलभाजप - ५७एमआयएम - ३३शिंदेसेना - १३उद्धवसेना - ६वंचित बहुजन आघाडी - ०४राष्ट्रवादी (शरद पवार) - ०१काँग्रेस - ०१एकूण- ११५