औरंगाबाद : खुलताबाद येथील भद्रा मारुतीच्या दर्शनाहून परतणाऱ्या तरुणाच्या दुचाकीला शरणापूर फाट्याजवळ शनिवारी मध्यरात्री दोन वाजण्याच्या सुमारास अपघात झाला. यात एका युवकाचा जागीच मृत्यू झाला, तर दुसरा जखमी झाला आहे. याप्रकरणी दौलताबाद पोलिस ठाण्यात आकस्मिक मृत्यूची नोंद केली आहे.
साजन संजय राजपूत (वय २७, रा. जयभवानीनगर) असे मृत युवकाचे नाव आहे. नवीन वर्षानिमित्त भद्रा मारुतीचे दर्शन घेऊन शहरात परत येणाऱ्या युवकाची दुचाकी (एमएच २० ईटी २४८५) घसरल्यामुळे पडली. त्याचवेळी पाठीमागून आलेल्या भरधाव वेगातील गाडीचे चाक युवकाच्या अंगावरून गेले. त्यामुळे तो जागीच ठार झाला. ही घटना शरणापूर फाट्याजवळील पेट्रोल पंपाच्या समोर घडली. साजन हा मित्रासह खुलताबादला दर्शनासाठी गेला होता. दुचाकीवर मागे बसलेल्या साजनला चक्कर येऊन तो खाली पडला. त्यामुळे दुचाकीचे संतुलन जाऊन मित्रही पडून किरकोळ जखमी झाला. पाठीमागून भरधाव वेगात येणाऱ्या एका कारच्या चाकाखाली तो सापडल्याने त्याचा जागीच अंत झाला.
घटनेची माहिती समजताच दौलताबाद पोलिस ठाण्याचे उपनिरीक्षक दिलीप बचाटे यांच्यासह सहकारी घटनास्थळी दाखल झाले. तोपर्यंत दौलताबादची ११२ गाडीसह १०८ क्रमांकाची रुग्णवाहिकाही घटनास्थळी पोहोचली. साजनला घाटी रुग्णालयात दाखल केले. त्याठिकाणी डॉक्टरांनी तपासून मृत घोषित केले. याप्रकरणी अधिक तपास पोलिस शिपाई रफिक पठाण करीत आहेत.