जालना रोडवरील गतिरोधकाने घेतला दुचाकीस्वाराचा बळी

सुरेश देवीदास जाधव (वय ४०, रा. आशानगर, चिकलठाणा ) असे मृताचे नाव आहे. ते चिकलठाणा विमानतळ येथे खासगी काम करायचे. काल रात्री ते पत्नी सीमासह मोंढा नाका परिसरातील नातेवाईकांच्या घरी भेटण्यास गेले होते. रात्री ११:३० वाजेच्या सुमारास जाधव दांम्पत्य मोटारसायकलने घरी जात होते. विमानतळासमोरील न्यू हायस्कूलजवळ दोन महिन्यांपूर्वी टाकलेले गतिरोधक त्यांना दिसले नाही. यामुळे गतिरोधकावर त्यांची दुचाकी जोराने आदळली आणि ते दुचाकीसह घसरून रस्त्यावर आदळले. या घटनेत सुरेश यांच्या डोक्याला गंभीर दुखापत झाली आणि चेहरा रोडवर आदळून नाक, तोंड आणि कानातून रक्तस्राव होऊन ते बेशुद्ध पडले. त्यांची पत्नीही यात गंभीर जखमी झाली. यानंतर सुरेश यांना रुग्णवाहिकेतून एमजीएम रुग्णालयात तर त्यांच्या पत्नीला घाटी रुग्णालयात दाखल करण्यात आले. रुग्णालयात उपचार सुरू असताना सुरेश यांचा रात्री उशिरा मृत्यू झाला. याप्रकरणी एमआयडीसी सिडको पोलीस ठाण्यात आकस्मिक मृत्यूची नोंद करण्यात आली. तर त्यांच्या पत्नीवर उपचार सुरू असल्याचे पोलिसांनी सांगितले.

चौकट

पेट्रोलपंपाच्या उद्घाटन समारंभाकरिता पालकमंत्री येणार होते. तेव्हा पंपापासून जवळच असलेल्या जालना रोडवर हे गतिरोधक टाकण्यात आले होते. अत्यंत धोकादायक स्थितीतील हे गतिरोधक सदोष आहे. ते टाकताना कोणतेही निकष पाळण्यात आलेले नाहीत. शिवाय, वाहनचालकांना अंधारात ते दिसत नाही. त्यामुळे त्यावर वाहने अचानक आदळतात.