रामकृष्णनगरात अडीच लाखांचा दरोडा

परभणी : शहरातील रामकृष्णनगरात प्रा़ प्रभाकरराव वाघमारे यांच्या घरी २२ जुलै रोजी रात्री दरोडा पडला़ यामध्ये २ लाख ६६ हजारांचा ऐवज लंपास करण्यात आला आहे़
शहरातील मध्यवर्ती ठिकाण असलेले रामकृष्णनगरातील रहिवासी प्रा़प्रभाकराव रामकिशनराव वाघमारे व त्यांच्या पत्नी नीलिमा हे दोघे घरी होते़ प्रभाकरराव वाघमारे हे सेवानिवृत्त कर्मचारी आहेत़ मंगळवारी रात्री पती, पत्नी दोघे घरी होते़ २३ जुलैच्या पहाटे २ ते २़३० च्या दरम्यान दरोडेखोरांनी पाठीमागील खोलीच्या खिडकीची ड्रिल काढून घरामध्ये प्रवेश केला़ रिमझिम पाऊस चालूच होता़ घरामध्ये प्रवेश केल्यानंतर त्यांनी प्रभाकरराव यांच्या गळ्यातील सोन्याचे लॉकेट काढून घेतले व नगदी ५५ हजार रुपयांची रोकड व इतर सोन्याचे दागिने असा एकूण २ लाख ६६ हजार रुपयांचा ऐवज दरोडेखोरांनी लंपास केला़ घरामध्ये दरोडेखोरांनी प्रवेश करताच प्रभाकरराव चोर चोर म्हणत जोरात ओरडले़ परंतु, पाऊस चालू असल्याने बाहेर आवाज पोहोचू शकला नाही़ शहरातील अतिशय गजबजलेल्या ठिकाणी हा दरोडा पडला आहे़ परिसरातील नागरिकांमध्ये भीतीचे वातावरण पसरले आहे़ या दरोड्याबाबतची माहिती नवा मोंढा पोलिसांना देण्यात आली़ (प्रतिनिधी)
याप्रकरणी नवा मोंढा पोलिस ठाण्यात प्रभाकर वाघमारे यांच्या तक्रारीवरून गुन्हा नोंद झाला आहे़ सहाय्यक पोलिस निरीक्षक लांडगे या प्रकरणाचा तपास करीत आहेत़ सहाय्यक पोलिस निरीक्षक लांडगे यांनी सांगितले, अशा स्वरुपाच्या चोरीच्या घटना यापूर्वी घडल्या आहेत का त्यावरून आरोपींचा शोध घेतला जात आहे़ सुरुवातीला शहरामध्ये तपास केला जात आहे़ घटनास्थळी ठसेतज्ज्ञांना पाचारण केले होते़