या परदेशी पाहुण्यांमध्येही झाली घट

एरवी अधिक प्रमाणात आढळून येणारे रोहित पक्षी, क्राैंच, पट्टेरी हंस, कुरव बदके यावर्षी अगदीच तुरळक आहेत. त्याचप्रमाणे मत्स्य गरुड, तपकिरी डोक्याचा माळभिंगरी कुरव, पलाश कुरव, चिखल्या, तुतारी, तुतवार, पाणघार, मलीन बदक, आकाशयोगिनी, लालसरी बदक, थापट्या बदक हे युरोप, सायबेरिया, रशिया, तिबेट या भागांतून येणारे परदेशी पक्षीही बोटावर मोजण्याइतकेच आहेत.

सुकना तलावाच्या आसपास असणाऱ्या झाडीझुडपांमध्ये नीळकंठ, नीलपंखी, वटवट्या, भोरड्या, मैना, अबलक मैना, वेडे राघू, ससाणा यासोबतच रंगीत करकोचा, पाणकावळे, जांभळा सारंग, बगळे, शेकाट्या, शराटी, सुरय हे पक्षी दिसून येत आहेत.

चौकट :

का घटले पक्ष्यांचे आगमन?

पाणवठ्यांमध्ये पाण्याची कमतरता असल्याने स्थलांतरित पक्ष्यांच्या संख्येत दरवर्षी घट होत असल्याचे बोलले जाते. मात्र, मागील दोन वर्षांपासून पाणवठे पूर्ण क्षमतेने भरलेले असूनही यावर्षी पक्ष्यांच्या संख्येत घट झाली आहे. याचे मुख्य कारण म्हणजे शहर परिसरात मोठ्या प्रमाणात झालेली वृक्षतोड. जायकवाडी, सुकना याठिकाणी अवैध मासेमारी, अतिक्रमणे, गाळपेरे असल्याने पक्ष्यांना भक्ष्य पकडण्यासाठी सुरक्षित जागा नाही. सांडपाणी तसेच पाणवठ्यांच्या आसपास केल्या जाणाऱ्या शेतीची घातक रसायने, यामुळे वाढलेले जलप्रदूषणही पक्ष्यांच्या आगमनाला मारक ठरते आहे.

-डॉ. किशोर पाठक, पक्षीतज्ज्ञ

सूचना

पक्ष्यांचे फोटो आहेत