छत्रपती संभाजीनगर : उज्जैनला जाण्यासाठी शहरात आलेले दोन तरुण रस्त्याने नातेवाइकांकडे पायी जात होते. दोन नशेखोरांनी त्यांच्यावर नाहक हल्ला करून गंभीर जखमी केले. सोमवारी दुपारी २:३० वाजता अदालत रोडवरील पगारीया बजाज शोरूमसमोर ही घटना घडली. यात गौरव संजय मावस (२३, रा. मांगेगाव, ता. गंगापूर) हा गंभीर जखमी झाला. त्याच्यावर घाटी रुग्णालयाच्या अतिदक्षता विभागात उपचार सुरू आहेत.
जखमी गौरव व विजय साळुंके यांचे सोमवारी न्यायालय परिसरात एक काम होते. शिवाय, रात्री त्यांना शहरातून उज्जैनलादेखील निघायचे होते. सोमवारी दुपारी २:३० वाजता भगवान महावीर चौकात उतरून ते सतीश मोटर्सच्या दिशेेने पायी निघाले. पगारीया बजाज शोरूमच्या समोरून पायी जात असताना अचानक त्यांच्यावर हल्ला झाला. टवाळखोरांनी चाकू काढून गौरवच्या पोट व छातीत खोलवर खुपसला. यात गौरव क्षणार्धात रक्तबंबाळ अवस्थेत रस्त्यावर कोसळून बेशुद्ध पडला. त्याला रुग्णवाहिकेद्वारे घाटीत दाखल करण्यात आले. रात्री उशिरा याप्रकरणी दोन अज्ञातांवर क्रांतिचौक पोलिस ठाण्यात गुन्हा दाखल करण्यात आला.
नशेखोरांकडून हल्ल्याचा संशयभर दिवसा झालेल्या हल्ल्याच्या घटनेने पोलिसही हैराण झाले. क्रांतीचौक, वेदांतनगर पोलिसांसह गुन्हे शाखेने धाव घेतली. सीसीटीव्ही फुटेजद्वारे संशयितांचा शोध सुरू करण्यात आला. दरम्यान, हा प्रकार नशेखोरांकडूनच झाल्याचा दाट संशय पोलिस अधिकाऱ्यांनी व्यक्त केला. एका हल्लेखोराने काळ्या रंगाचे जॅकेट परिधान केले होते. त्याची उंची ५.६ फूट होती. तर दुसऱ्या कुरळे केसाच्या हल्लेखोराने टी-शर्ट परिधान केला होता.
Web Summary : Two men, visiting Aurangabad, were attacked on Adalat Road. One, identified as Gaurav Mavas, was seriously injured and is in critical condition. Police suspect the assailants were intoxicated and are investigating via CCTV footage.
Web Summary : औरंगाबाद में अदालत रोड पर दो युवकों पर हमला हुआ। गौरव मावस गंभीर रूप से घायल हो गए। पुलिस को संदेह है कि हमलावर नशे में थे। सीसीटीवी फुटेज से जांच जारी है।