प्रचलित अनुदानाचा टप्पा लवकरच मार्गी लावणार

औरंगाबाद : कायम विनाअनुदानित शिक्षकांना प्रचलित धोरणानुसार अनुदानाचा टप्पा देण्याचा शासन आदेश पदवीधर मतदारसंघाची आचारसंहिता संपुष्टात आल्यानंतर जारी होईल.

सर्व अघोषित शाळा घोषित होणार तसेच अनुदान प्रचलित नियमाप्रमाणे १ एप्रिल २०१९ पासून दिले जाणार आहे, असे आश्वासन मुप्टा शिक्षक संघटनेच्या वाळूज

महानगर येथे आयोजित करण्यात आलेल्या शिक्षक मेळाव्यात आमदार विक्रम काळे यांनी दिले.

या मेळाव्यात वाळूज महानगर परिसरातील शिक्षक मोठ्या संख्येने उपस्थित होते. मुप्टा शिक्षक संघटनेचे संस्थापक सचिव सुनील मगरे म्हणाले की, शिक्षकांना भयमुक्त व शोषणमुक्त करण्यासाठी मुप्टा संघटना सातत्याने आक्रमक भूमिका घेत आहे. भविष्यात वाळूज महानगर परिसरातील शिक्षकांच्या प्रश्नांना न्याय मिळवून देण्यासाठी मुप्टा संघटनेचा व्यापक प्रमाणात विस्तार केला जाणार आहे.

या मेळाव्यास भाकर टेकाळे, राजू जाधव, पद्माकर कांबळे, शिवराम म्हस्के, शेख मुनीर, सुनील पांडे आदी प्रमुख पाहुणे म्हणून उपस्थित होते. मेळाव्याचे प्रास्ताविक बी.जी. गायकवाड यांनी केले. उपस्थितांचे आभार लक्ष्मण हिवाळे यांनी मानले.

मेळाव्याच्या यशस्वीतेसाठी एस.एस. कादरी, संदीप काजळे, विकास सवई, कुमार बिरदवडे, उमेश डावखर, मिलिंद भालेराव, छगन झोडपे, मनीषा कांगुणे, अविनाश सोनटक्के, गणेश तेलंगरे, जयश्री गरुड, गोरख पगार, राजेंद्र घटकर आदींनी परिश्रम घेतले.

कॅप्शन:

मुप्टा शिक्षक संघटनेच्या वाळूज महानगर येथे आयोजित शिक्षक मेळाव्यात आ. विक्रम काळे, प्रा. सुनील मगरे, बी.जी. गायकवाड.