सखी मंचच्या सदस्यांसाठी सुखकर्ता स्पर्धेचे आयोजन

औरंगाबाद : कलाकुसर, नक्षीकाम व आकर्षक सजावटीची हौस असणाऱ्या सखींसाठी सुखकर्ता स्पर्धेचे आयोजन करण्यात आले आहे. सुखकर्त्याचे स्वागत करत सणावाराला सजावटीचे कोंदण बहाल करणाऱ्या महिलांना लोकमत सखी मंच आयोजित ‘सुखकर्ता-उत्सव महाराष्ट्राचा’च्या माध्यमातून आपली कला सादर करता येईल. मोदक बनवा स्पर्धा व रांगोळी स्पर्धेच्या माध्यमातून विविध बक्षिसे मिळवण्याची संधीही यातून उपलब्ध होणार आहे. तसेच आगामी बहुचर्चित ‘गुलाबी’ मराठी चित्रपटातील अभिनेते सचिन खेडेकर व टीमशी संवादही यावेळी रंगणार आहे.
घरोघरच्या महिलांच्या कलाकुसरीला दाद देण्यासाठी लोकमत सखी मंंचने आयोजित केलेल्या ‘मोदक बनवा व रांगोळी’ स्पर्धा लोकमत सखी मंच सदस्यांसाठी असून त्यासाठी ४ सप्टेंबरपर्यंत नावनोंदणी करणे आवश्यक आहे. येत्या शुक्रवारी (५ सप्टेंबर) सकाळी साडेदहा वाजता स्पर्धा घेतल्या जाणार असून रांगोळीसाठी लागणारे सर्व साहित्य महिलांनी घरूनच आणणे अपेक्षित आहे. याच दिवशी सकाळी साडेअकरा वाजता होणाऱ्या मोदक स्पर्धेसाठी मोदक घरूनच बनवून आणणे आवश्यक आहे. सजावट स्पर्धेच्या ठिकाणी करता येईल. नावनोंदणीसह अधिक माहितीसाठी लोकमत भवन, जालना रोड येथे सकाळी अकरा ते पाच या वेळेत ९५५२५६४५६० या क्रमांकावर संपर्क साधावा. संत तुकाराम नाट्यगृह (सिडको नाट्यगृह) येथे आयोजित या स्पर्धेसाठी अर्धा तास अगोदर उपस्थित राहणे गरजेचे आहे. याच ठिकाणी दुपारी बारा वाजता ‘गुलाबी’ चित्रपटाच्या टीमशी रसिकांना दिलखुलास गप्पा मारता येतील. बक्षिसांचे प्रायोजकत्व डेकोर झोन कीचन ट्रॉली यांनी स्वीकारले आहे.