लज्जतदार पदार्थ शिकण्याची संधी

औरंगाबाद - स्वयंपाकघराच्या क्वीन असलेल्या गृहिणींना आपण वेगळा पदार्थ बनवावा आणि तो कुटुंबाने आवडीने खावा, असे नेहमीच वाटते. लहान मुलांचे खाण्याचे शौक काही वेगळेच. अशा वेळी पदार्थ बनविताना तारेवरची कसरत करणार्‍या गृहिणींना लज्जतदार पदार्थ बनविण्याची संधी लोकमत सखी मंच व चिंगज्ने उपलब्ध करून दिली आहे. १४ मे २०१४ रोजी दुपारी १२ वाजता ‘चिंगज् का तडका’ या कार्यक्रमाच्या माध्यमातून प्रसिद्ध शेफ हरपाल सोखी प्रात्यक्षिके दाखवून खास टिप्सही देणार आहेत. हा कार्यक्रम लोकमत हॉल, लोकमत भवन, जालना रोड येथे होणार आहे. स्वयंपाकघर हा गृहिणींचा अत्यंत जिव्हाळ्याचा विषय. दररोजच्या स्वयंपाकात नवनवीन बदल करून आपल्या कुटुंबियांच्या पोटोबाला खुश करण्याची धडपड गृहिणी सतत करत असतात; परंतु दररोज कुठला वेगळा पदार्थ बनवावा अथवा पारंपरिक पदार्थात काय नवीन बदल करावा, हा यक्षप्रश्न महिलांपुढे उभा राहतोच. या प्रश्नाचे उत्तर महिलांना ‘चिंगज् का तडका’ या कार्यक्रमाच्या माध्यमातून मिळणार आहे. या कार्यक्रमाला येताना लोकमत सखी मंचच्या सभासदांनी ओळखपत्र दाखविणे आवश्यक आहे.