रात्रीतून सात घरे फोडली; हजारोंचा माल पळविला

बीड: शहरातील गुरुकुल इंग्लिश स्कुलच्या समोरच्या परिसरातील दोन बिल्डींगमधील सहा घरे व त्यापासून जवळच असलेले एक घर चोरट्यांनी साफ करत हजारो रुपयांचा ऐवज चोरुन नेला. ही घटना शुक्रवारी पहाटे दोन ते तीन वाजण्याच्या सुमारास घडली. विशेष म्हणजे चोरट्यांनी गावाला गेलेल्या लोकांच्या घरातच चोरी केली. त्यामुळे चोरट्यांनी नजर ठेवून ही घरे फोडली असल्याचा अंदाज व्यक्त केला जात आहे. शहरातील गुरुकुल नगर भागात जवळपास दहा ते बारा चोरटे शुक्रवारी रात्री दोन ते तिनच्या सुमारास दाखल झाले. एका बिल्डिंगमधील तिन घरात घुसले. या बिल्डींगमधील नागरिक परगावी गेले असल्याने या घरांमध्ये कोणीच नव्हते. चोरट्यांनी गेटचे कुलूप मोठ्या शिताफीने तोडून बिल्डींगमध्ये प्रवेश केला. बाळासाहेब खरसाडे यांच्या घरात जाऊन अलमारीतील चोरीचा प्रयत्न केला. त्यानंतर वरच्या मजल्यावर असलेल्या बनसोडे यांच्या घरात घुसून असाच चोरीचा प्रयत्न झाला. तसेच त्याच बिल्डिंगमधील नेवडे यांच्या तिसर्‍या मजल्यावर असलेल्या घरात जाऊन आलमारी फोडली. त्यांना कपाटातील लॉकर तोडता आले नाही. त्यामध्ये जवळपास दहा तोळे सोने होते. त्यानंतर चोरट्यांनी जवळच असलेल्या लाखे यांच्या बिल्डींगमध्ये भिंतीवर उड्यामारुन प्रवेश केला. प्रथम त्यांनी सपकाळ यांच्या घराचे कुलूप तोडून घरात ठेवलेले नगद पाच हजार रुपये घेतले. त्यानंतर दुसर्‍या मजल्यावर असलेल्या तात्याराव पवार यांच्या घराचे कुलूप तोडून घरातील सोने दागिने असा एकूण अडीज तोळ्याचे दागिने चोरले अंदाजे ५५ हजार रुपयांचे दागिने चोरले. त्र्यंबक लाखे यांच्या घरात चोरट्यांना काही मिळून आले नसल्याने तेथून ते पसार झाले. चोरी झाली असल्यची बाब काही लोकांच्या निदर्शनास आल्यानंतर त्यांनी पोलिसांना याची खबर दिली. त्यावेळी गया नगर येथील नागरिक गुरुकूल नगर येथे आले असता चोरट्यांनी गया नगर येथील चौधरी यांच्या घरात चोरी केली. शुक्रवारी सकाळी श्वान पथक व ठसे तज्ज्ञांना पाचारण करण्यात आले. स्थानिक गुन्हे शाखेचे प्रमुख पोलिस निरिक्षक सी.डी. शेवगण, दरोडा प्रतिबंधक पथकाचे भारत राऊत यांनी घटनास्थळास भेट दिली. एकाच रात्रीतून सात घरे फोडण्यात आली असल्याने परिसरातील नागरिकांमध्ये भिती निर्माण झाली आहे. या प्रकरणी सहा पैकी एकाने शिवाजी नगर पोलिस ठाण्यात गुन्हा दाखल केला. ज्ञानेश्वर ज्योतीराम पवार यांच्या फिर्यावदीवरुन अज्ञात चोरट्यांविरुद्ध गुन्हा दाखल करण्यात आला आहे. तपास पोनि चव्हाण करीत आहेत. गस्त घालणारे पोलिस फिरकतच नाहीत गुरुकुल नगरचा भाग शिवाजी नगर पोलिसांच्या हद्दीत येतो. या भागात आता पर्यंत केव्हांच पोलिस पेट्रोलिंगची गाडी येत नाही. गस्त घालणार्‍या पोलिसांची गाडी गया नगर मार्गे येते आणि जाते. गुरुकुल नगर पसिरात पोलिस येत नसल्याने चोरीट्यांना घरे फोडण्यास संधी निर्माण झाली आहे. त्यामुळे या परिसरात पोलिसांनी गस्त घालावी अशी मागणी या भागातील नागरिकांतून व्यक्त होत आहे. परिसरात असतो कायम अंधार गुरुकुल नगर हा भाग नगर परिषद भागात समाविष्ठ झाला आहे. या भागात अनेक नागरी सुविधांचा आभाव आहे. त्यातील विशेषबाब म्हणजे, गुरुकुल नगर भागात प्रत्येक खांबावर लाईट बसविण्यात आलेली नाही. त्यामुळे रात्रीच्यावेळी या परिसरात भिती दायक वातावरण पहावयास मिळते. गुरुकुल नगर भागात मास्क हेड बसविण्याची मागणी नागरिकांनी केली आहे. (प्रतिनिधी)