गंगापूर : जेवताना कायम रडते म्हणून दीड वर्षीय सावत्र मुलीला विधिसंघर्षग्रस्त पित्याने जमीनीवर आपटून क्रुरपणे खून केला. ही धक्कादायक घटना बुधवारी (१९) रात्री भेंडाळा शिवारातील अंतापुरात घडली. यानंतर मयत मुलीच्या आईने रागाच्या भरात दिराच्या दोन वर्षीय चिमुकलीला घेऊन पोबारा केला. या घटनेमुळे गंगापूर तालुका हादरला आहे.
पहिल्या पतीपासून वेगळ्या राहणाऱ्या अश्विनी करण भोसले (२०) यांनी आपल्या दीड वर्षाच्या सवसंया या मुलीसह दोन महिन्यांपूर्वी अंतापुरात येथील १४ वर्षीय विधिसंघर्षग्रस्तासोबत विवाह केला होता. दीड वर्षाची सवसंया ही जेवताना नेहमी रडते म्हणून चीड आल्याने सावत्र बापाने बुधवारी रात्री साडेआठ वाजेच्या सुमारास सवसंयाला उचलून घराबाहेर नेऊन जोराने जमिनीवर आपटले. यात त्या कोवळ्या जीवाचा जागीच मृत्यू होऊन कायमस्वरुपी आवाज बंद झाला. यानंतर विधिसंघर्षग्रस्ताने कोणाला काही कळू नये, म्हणून चिमुकलीचा मृतदेह जमिनीत पुरला.
घरच्यांनी मुलीबद्दल त्या विधिसंघर्ष पित्याला विचारले असता त्याने काहीही माहिती दिली नाही. यावरुन त्याच्या आई-वडिलांनी त्यास कोंडून मारहाण करीत विचारपूस केली. त्यानंतर त्याने घडलेली घटना सांगितली. तेव्हा मयत मुलीची आई अश्विनीने घटना ऐकून टाहो फोडला. यानंतर रागाच्या भरात तिने दिराच्या दोन वर्षीय रिया रावण भोसले या मुलीला घेऊन पलायन केले. घडलेल्या या सर्व प्रकाराची माहिती विधीसंघर्षग्रस्ताच्या आईने गंगापूर पोलिसांना गुरुवारी दिली. पोलिसांनी सावत्र मुलीचा खून करणाऱ्या विधिसंघर्षग्रस्तास ताब्यात घेत पुरलेला मृतदेह बाहेर काढून घटनास्थळाचा पंचनामा केला व मुलीचे शवविच्छेदन केले. विधीसंघर्षग्रस्त पित्यावर गुन्हा दाखल करण्यात आला आहे. पुढील तपास पोलीस निरीक्षक संजय लोहकरे यांच्या मार्गदर्शनाखाली दीपक औटे, गुप्त वार्ता शाखेचे योगेश हरणे, स्वाती गायकवाड, निंबोरकर, शेख भिल्ल करीत आहेत.
निष्पाप रिया अडकलीनवऱ्याने आपल्या मुलीचा खून केल्याची घटना कानी आल्यावर तिची आई अश्विनीने आपल्या दिराच्या दोन वर्षीय रिया या मुलीला घेऊन घटनास्थळावरून पळ काढला. यात त्या निष्पाप रियाचा काहीही दोष नसताना विनाकारण तिला धारेवर धरले गेले आहे. रियाचे आई-वडील, आजी-आजोबांचा जीव यामुळे कासावीस झाला असून, आमची मुलगी शोधून आणा, अशी आर्त विनवणी त्यांनी गंगापूर पोलिसांकडे केली आहे. रागाच्या भरात अश्विनी त्या चिमुकलीसोबत काही बरेवाईट करेल, असा संशय पोलिसांना आहे. त्यामुळे तिचा कसून शोध सुरु आहे.