पाचोड- पाचोड ते पैठण रोडवर पाचोडपासून जवळ असलेल्या भुमरे पाटील पेट्रोल पंपासमोर अज्ञात वाहनाने मोटरसायकलला दिलेल्या धडकेत मोटरसायकल वरील दोन जण जागीच ठार झाल्याची घटना रविवारी सायंकाळी साडेसात वाजता घडली आहे.
पाचोड पोलीस सूत्रांकडून मिळालेल्या माहितीनुसार थेरगाव येथील छगन एकनाथराव भांगळ(वय ५८) रविवारच्या आठवडी बाजारासाठी पाचोडला आले होते. पाचोड येथील कामकाज आटोपून ते आपल्या मोटरसायकलवरुन गावाकडे जात असताना पाचोडला बस स्थानकासमोर लिंबगाव येथील सोसायटीचे चेअरमन गोरख भाऊराव हिंगले पाटील(वय ६०) हे त्यांना भेटले.
मोटरसायकलचे पेट्रोल संपल्यामुळे गोरख हिंगले हे छगन भांगळ यांच्या मोटरसायकलवर बसून पाचोड ते पैठण रोडवर असलेल्या भुमरे पाटील पेट्रोल पंपावर पेट्रोल भरण्यासाठी जात असताना पैठण कडून पाचोडकडे येणाऱ्या अज्ञात वाहनाने मोटरसायकलला जोराची धडक दिली. या भीषण अपघातात मोटरसायकलवरील दोघांना डोक्याला गंभीर मार लागल्यामुळे दोघेही घटनास्थळी जागीच ठार झाले.
या अपघाताची माहिती या रोडवरून जाणाऱ्या ग्रामस्थांनी तातडीने पाचोड पोलीस स्टेशनला दिली. यावेळी पाचोड पोलीस स्टेशनचे सहाय्यक पोलीस निरीक्षक शरदचंद्र रोडगे पाटील, पोलीस उपनिरीक्षक ज्ञानेश्वर राडकर, सहाय्यक पोलीस उपनिरीक्षक अण्णासाहेब गव्हाणे यांनी तातडीने घटनास्थळी दाखल होऊन दोन्हीही मृतदेह गावकऱ्यांच्या मदतीने पाचोड येथील ग्रामीण रुग्णालयात दाखल केले. यावेळी वैद्यकीय अधिकारी डॉक्टर संदिपान काळे यांनी या दोघांना तपासून मयत घोषित केले. यानंतर पाचोड पोलिसांनी घटनास्थळी जाऊन पंचनामा केला आणि रविवारी रात्री नऊ वाजेच्या सुमारास पाचोड पोलीस स्टेशनला अपघाताची नोंद करण्यात आली आहे.