विभागीय व जिल्हास्तरीय माध्यम कक्षाची स्थापना

आदर्श आचारसंहितेची प्रभावीपणे अंमलबजावणी करा

औरंगाबाद : मराठवाडा पदवीधर मतदारसंघ निवडणुकीचा निवडणूक कार्यक्रम जाहीर झालेला आहे. त्यादृष्टीने पोलीस, महसूल अधिकारी आदी सर्व यंत्रणांनी समन्वय ठेवून आदर्श आचारसंहितेची प्रभावीपणे अंमलबजावणी करावी. त्याचबरोबर राजकीय पक्ष, उमेदवार, उमेदवारांच्या प्रतिनिधींना आवश्यक असलेल्या विविध परवानग्या एक खिडकी सुविधेतून देण्यात येणार असल्याने सर्वांनी निवडणूक अनुषंगाने आवश्यक कार्यवाही तत्पर करावी, अशा सूचनाही जिल्हाधिकरी सुनील चव्हाण यांनी अधिकाऱ्यांना केल्या. जिल्हाधिकारी कार्यालय सभागृहात कायदा, सुव्यवस्था व आदर्श आचारसंहिता अंमलबजावणीबाबत चव्हाण यांच्या अध्यक्षतेखाली बैठक पार पडली. या बैठकीस पोलीस आयुक्त निखिल गुप्ता, पोलीस अधीक्षक मोक्षदा पाटील, अप्पर जिल्हाधिकारी डॉ. अनंत गव्हाणे, उपजिल्हाधिकारी, तहसीलदार, उपविभागीय पोलीस अधिकारी आदींची उपस्थिती होती.

परवानगीसाठी एक खिडकी योजना

औरंगाबाद : पदवीधर निवडणुकीसाठी तात्पुरते प्रचार कार्यालय, वाहन परवाना, होर्डिंग, बॅनर, झेंडे, पोस्टर, ध्वनिक्षेपक, मिरवणूक, रॅली, रोड शो, जाहीर सभा, राजकीय पक्षांच्या बैठका, चौक सभा आदींच्या परवानग्यांसाठी जिल्हाधिकारी कार्यालयात एक खिडकी सुविधा सुरू केली आहे. संबंधित विभागाच्या अधिकाऱ्यांनी आलेल्या प्रकरणांवर तात्काळ प्रक्रिया करावी, जेणेकरून राजकीय पक्ष आणि प्रशासकीय यंत्रणेत योग्य समन्वय राखून निवडणूक प्रक्रिया सुरळीत पार पडेल, असे जिल्हा प्रशासनाने कळविले आहे.

राजकीय पक्षांशी जिल्हाधिकाऱ्यांचा संवाद

औरंगाबाद : जिल्हाधिकारी सुनील चव्हाण यांनी जिल्हाधिकारी कार्यालयाच्या सभागृहात बैठक घेऊन राजकीय पक्षाच्या प्रतिनिधींशी मंगळवारी संवाद साधला. पदवीधर मतदारसंघ निवडणुकीसाठी प्रशासनामार्फत करण्यात येत असलेल्या विविध उपाययोजना व सुविधांबाबत उपस्थित प्रतिनिधींशी संवाद साधला. या बैठकीस डॉ. कल्याण काळे, डॉ. भाऊसाहेब जगताप, राजेश मेहता, नितीन बागवे, विजय औताडे आदींची उपस्थिती होती.