छत्रपती संभाजीनगर : उपवास कुठलाही असू देत, फराळात बहुतांश वेळा भगर खाल्ली जाते. ही भगर जर बुरशीचा प्रादुर्भाव झालेली असेल तर अन्नातून विषबाधा होऊन गंभीर आजाराला सामोरे जाण्याची वेळ येऊ शकते. या पार्श्वभूमीवर प्रशासनाने नागरिकांना सतर्क राहण्याचे आवाहन केले आहे. तसेच बुरशीचा प्रादुर्भाव झालेली भगर विक्री करताना आढळल्यास संबंधित विक्रेत्यांविरुद्ध कारवाईचा इशारा निवासी उपजिल्हाधिकारी तथा जिल्हा आपत्ती व्यवस्थापन प्राधिकरणाचे मुख्य कार्यकारी अधिकारी प्रवीण फुलारी यांनी दिला आहे.
भेसळयुक्त भगर विक्री टाळण्यासाठी अन्न व औषध प्रशासन भगर विक्री करणाऱ्या दुकानांची तपासणी करणार आहे. पॅकबंद भगरची विक्री, पॅकेट, पोत्यावर उत्पादकांचा पत्ता, परवाना क्र., पॅकिंग व अंतिम वापर तारीख आहे की नाही, याची तपासणी होईल. मुदतबाह्य भगर किंवा पिठाची विक्री होताना आढळल्यास तसेच भेसळयुक्त, बुरशीयुक्त भगरची विक्री करणाऱ्या वा नियमांचे उल्लंघन करणाऱ्या विक्रेत्यांवर अन्न सुरक्षा अधिनियमांतर्गत कारवाई करण्यात येईल, असा इशाराही फुलारी यांनी दिला आहे.
भगरीवर कोणती बुरशी असते...भगरीवर ‘अस्परगिलस’ प्रजातीच्या बुरशीचा प्रादुर्भाव होतो. ज्यामुळे फ्युमिगाक्लेविन यासारखी विषद्रव्ये तयार होतात. पावसाळ्यातील वातावरण बुरशीच्या वाढीसाठी अनुकूल असते. अशी बुरशीचा प्रादुर्भाव झालेली भगर खाण्यात आल्यास त्यातून विषबाधा होऊ शकते.
भगर खाण्यापूर्वी व खाताना कोणती काळजी...शक्यतो पाकीटबंद भगर घ्या. सुटी भगर घेऊ नका. भगर घेताना पाकिटावरील पॅकिंग व अंतिम वापर तारीख तपासा. भगर साठवताना ती कोरड्या ठिकाणी, झाकणबंद डब्यात ठेवा. जेणेकरून वातावरणातील ओलाव्यामुळे बुरशीची वाढ होणार नाही. जास्त दिवस साठवलेली भगर व पीठ खाऊ नका. शक्यतो भगरीचे पीठ विकत आणू नका. पिठाला बुरशीची लागण होण्याची शक्यता जास्त असते. भगरीच्या दशम्या, भाकरीऐवजी खिचडी खावी. भगरीचे पीठ आवश्यक तेवढेच दळून घ्या. बाहेरून दळून आणण्यापेक्षा घरीच दळा. दोन ते तीन दिवस सलग उपवासाच्या पदार्थांचे सेवन केल्यास ॲसिडिटी होऊन उलटी, मळमळ व पोटाचे त्रास होऊ शकतात.