पोलिसांत तक्रार : नुकसानभरपाई देण्याची मागणी
गोंडपिपरी : तालुक्यातील करंजी येथील ग्रामपंचायतीने वीजतारांना अडसर ठरणाऱ्या वृक्षांची तोड करण्याचा ठराव पारित केला होता. मात्र वीज वितरण कंपनीच्या कर्मचाऱ्यांनी झाडाची फांदी छाटणे सोडून इतर खासगी जागेवरील जुन्या वृक्षांची कत्तल केल्याचा प्रताप समोर आला असून, यासंबंधी जागा मालकाने पोलिसांत तक्रार दिली आहे.
ग्रामपंचायत करंजीअंतर्गत पाण्याच्या टाकीजवळील काही वृक्षांची वाढलेली फांदी पाहून वीज प्रवाहित करणाऱ्या तारांना स्पर्श होत असल्याचे निदर्शनास आले. यावरून ग्रामपंचायतीने विद्युततारांना अडसर ठरणाऱ्या वृक्षफांद्या तोडण्याबाबत ठराव पारित करून वीज वितरण कंपनीला सूचना दिल्या. मात्र वीज वितरण कंपनीचे लाइनमन शेडमाके यांनी करंजी येथील तुकेश पत्रूजी वानोडे यांच्या सर्व्हे नंबर ९६३ मधील खासगी जागेत अंदाजे २५ ते ३० वर्षांपासून सजीव शिसम जातीच्या चार वृक्षांची बुडापासून कत्तल केली. तर एक झाड अर्धवट कापले आहे. यामुळे तुकेश वानोडे यांचे लाखोंचे नुकसान झाले असून, त्यांनी याबाबत ग्रामपंचायत व वीज वितरण कंपनी कार्यालयाकडे विचारणा केली असता उडवाउडवीची उत्तरे मिळाल्याने अन्यायग्रस्त वानोडे यांनी गोंडपिपरी पोलीस स्टेशन गाठून यासंदर्भात ग्रामपंचायत करंजी, सहायक अभियंता वीज वितरण कार्यालय गोंडपिपरी तसेच लाइनमन व इतर दोन यांच्यावर कारवाई करून नुकसानभरपाई देण्याबाबतची लेखी तक्रार केली. या घटनेचा पोलिसांकडून तपास सुरू आहे.