राजेश भाेजेकर
चंद्रपूर : आनंदवनच्या महारोगी सेवा समितीच्या सीईओ डाॅ. शीतल आमटे यांच्या मृत्यूमागे आत्महत्या वा घातपात आहे ही बाब अद्याप स्पष्ट झाली नसली तरी डाॅ. शीतल यांनी आठ-दहा दिवसांपूर्वीच आपल्या मोबाईल, टॅब व लॅपटाॅपचे पासवर्ड बदलले असल्याची धक्कादायक माहिती पुढे आली आहे. डाॅ. शितल यांचे पती गौतम करजगी यांनाही हे पासवर्ड माहीत नाही. ही बाब सायबर सेलच्या तपासात पुढे आल्याची माहिती विश्वसनीय पोलीस सूत्राने ‘लोकमत’ला दिली.
उल्लेखनीय, डाॅ. शीतल यांचे दोन मोबाईलसह टॅब व लॅपटाॅप पोलिसांनी ताब्यात घेत आहे. यामध्ये एक मोबाईल ॲपल कंपनीचा आहे. या मोबाईलला डाॅ. शीतल यांनी स्वत:चे ‘डोळे’ पासवर्ड ठेवले आहे. जोपर्यंत मोबाईलचे स्क्रीन डाॅ. शीतल यांचे डोळे ‘स्कॅन’ करणार नाही तोपर्यंत हा मोबाईल उघडणार नाही. हा पासवर्ड तोडण्यासाठी चंद्रपूर सायबरचे प्रयत्न निष्फळ ठरले. मोबाईल, टॅब व लॅपटाॅप पासवर्ड तोडण्यासाठी नागपूरला पाठविले असल्याचे पोलीस सूत्राने सांगितले.
बाॅक्स
डाॅ. शीतलचा मोबाईल बोलणार
डाॅ. शीतल यांनी विषारी इंजेक्शन टोचून आत्महत्या केली असावी, याबाबीचा अद्याप उलगडा झालेला नाही. याचा शोध घेण्यासाठी पोलिसांनी चौफेर चौकशी केली तरी काहीही हाती लागले नाही. महत्त्वाचा पुरावा म्हणून पोलीस मोबाईल, टॅब व लॅपटाॅपकडे बघत आहे. येथेही पासवर्डचा व्यत्यय आला आहे. त्यात काय दडले आहे. याची पोलिसांना प्रतीक्षा आहे.
डाॅ. शीतल यांची खोली गौतम करजगींच्या हवाली
डाॅ. शीतल आमटे ज्या खोलीमध्ये बेशुद्धावस्थेत आढळल्या होत्या. पोलिसांनी तपासपूर्ण करून ही खोली डाॅ. शीतल यांचे पती गौतम करजगी यांच्या हवाली केली आहे.
मृत्यू कशानेही असो, पोलिसांना शोधावे लागणार कारण
मृत्यूचा शोध घेणारे काही धागेदोरे गवसल्याचे पोलीस सूत्र सांगत असले तरी यामागील नेमक्या कारणांचा शोध पोलिसांना घ्यावा लागणार आहे. पोलिसही त्या दिशेने तपास करीत असल्याची माहिती आहे.
फाॅरेन्सिक लॅबला एसीपींचे खास पत्र
प्राथमिक पोस्टमार्टम रिपोर्टमधून काहीही निष्पन्न झाले नाही. फाॅरेन्सिक लॅबचा अहवाल प्रकरणाच्या खोलात जाण्यासाठी महत्त्वाचा ठरणार आहे. हा अहवाल जलगतीने प्राप्त व्हावा, यासाठी स्वत: पोलीस अधीक्षक अरविंद साळवे यांनी नागपूरच्या फाॅरेन्सिक लॅबला खास पत्र पाठवून अहवाल लवकर उपलब्ध करून द्यावा, अशी मागणी केल्याचे समजते.
आमटे कुटुंबीयांचे बयाण नोंदवणार
डाॅ. शीतलच्या मृत्यूवर आमटे कुटुंबीयांनी अद्याप कोणतीही प्रतिक्रिया दिलेली नाही. पोलिसांनी आनंदवनातील काही लोकांची चौकशी केली. आमटे कुटुंबीय प्रचंड धक्क्यात असल्यामुळे त्यांचे बयाण नोंदविले नव्हते. परंतु, प्रकरण रहस्यमय बनल्याने पोलीस आमटे कुटुंबीयांचे बयाण नोंदविणार आहे.