खासदार बाळू धानोरकरांची प्रकृती खालावली; नागपूरहून दिल्लीसाठी ‘एअरलिफ्ट’

विशेष एअर रुग्णवाहिकेतून दिल्लीत उपचारासाठी केले दाखल

चंद्रपूर : राज्यातील काँग्रेसचे एकमेव खासदार सुरेश ऊर्फ बाळू धानोरकर यांची प्रकृती अचानक खालावल्याने त्यांना नागपूर येथील एका रुग्णालयातून विशेष एअर रुग्णवाहिकेद्वारे उपचारासाठी दिल्ली येथील वेदांता रुग्णालयात हलविण्यात आले आहे. विशेष म्हणजे २७ मे रोजी खासदार धानोरकर यांच्या वडिलांचे निधन झाले होते. मात्र, प्रकृती अस्वस्थामुळे अंत्यविधीला उपस्थित झाले नव्हते. अशातच त्यांची प्रकृती आणखीनच खालावल्याने त्यांना विशेष एअर रुग्णवाहिकेतून दिल्लीत उपचारासाठी दाखल करण्यात आले आहे.

मागील दोन ते तीन दिवसांपासून धानोरकर यांच्यावर नागपूरच्या खासगी रुग्णालयात उपचार सुरू होते. मात्र रविवारी त्यांनी प्रकृती खालावल्याने त्यांना तत्काळ दिल्ली येथे उपचारासाठी नेण्यात आले. याबाबत स्वतः धानोरकर यांनी प्रतिक्रिया देत नागपूर येथील खासगी रुग्णालयात किडनी स्टोनवर उपचार केल्यानंतर पोटात दुखू लागल्याने तपासणीसाठी दिल्ली येथील वेदांता हॉस्पिटल येथे जात आहे. माझी प्रकृती स्थिर असून, कार्यकर्त्यांनी घाबरून जाऊ नये, किंवा भयभीत होऊ नये, वैद्यकीय सल्ल्यानुसार पुढील काही दिवस तपासणी, उपचार आणि विश्रांती घेत असल्याचे धानोरकर यांनी प्रसिद्धीपत्रकातून कळविले आहे.