राजेश मडावीलोकमत न्यूज नेटवर्कचंद्रपूर : राज्य सरकारने चंद्रपूर जिल्ह्यातील दारूबंदी उठविण्याचा धाडसी निर्णय घेताच लिकर लॉबी सुखावली. काही दिवसात यासंदर्भात अधिसूचनाही जारी होईल. मात्र मद्यविक्री परवान्यांचे नुतनीकरण करण्यासाठी राज्य सरकार नवीन निकष लागू करणार का, याकडे आता लिकर लॉबीचे लक्ष लागले आहे. चंद्रपूर जिल्ह्यात दारूविरूद्ध महिलांचे आंदोलन पेटल्यानंतर तत्कालीन भाजप सरकारने १ एप्रिल २०१५ रोजी दारूबंंदी केली. तेव्हापासून लिकर लॉबीवर अवकळा आली तर अनेकांनी नवीन व्यवसाय सुरू केले. राज्यातील महाविकास आघाडी सरकारने निवृत्त अधिकारी रमाकांत झा समितीच्या शिफारशींवरून गुरुवारी चंद्रपूर जिल्ह्यातील दारूबंदी उठविली. राज्य सरकारच्या या निर्णयाचे अनेकांनी स्वागत केले तर काहींनी विरोधही दर्शविला. राज्य सरकारकडून येत्या काही दिवसात दारूबंदीबाबत अधिसूचना जाहीर होईल. त्यानंतर जिल्हा समिती गठित होऊन नवीन परवाने देणे किंवा जुन्या परवान्याच्या नुतनीकरणाची प्रक्रिया सुरू होईल. परंतु परवाना नुतनीकरणासाठी राज्य सरकार नवीन निकष लागू करणार की जुनेच निकष कायम ठेवणार, याबाबत चंद्रपुरातील लिकर लॉबीत आता खलबते सुरू झाली आहेत. राज्य शासन अधिसूचना कधी जारी करणार याकडे आता लिकर लॉबीसह जिल्ह्यातील अनेकांचे लक्ष लागले आहे.
नुतनीकरणासाठी लागणारे प्रमाणपत्रसीएल, एफएल, बियर, वाईन शॉपीचा नवीन परवाना अथवा नुतनीकरणासाठी हॉटेलचा परवाना, जागेचा नकाशा, अन्न व औषध प्रशासन, आरोग्य विभागाची परवानगी, स्थानिक स्वराज्य संस्थांकडून ना हरकत, आयकर व विक्रीकर थकीत नसल्याचे प्रमाणपत्र, डीडी, बँक हमी, ऐपत पत्र व अन्य कागदपत्रे लागतात. राज्याच्या उत्पादन व शुल्क विभागाकडून इच्छूकांचे ऑनलाईन अर्ज व प्रमाणपत्र स्वीकारले जाते.
जिल्हा समिती करणार प्रस्तावांची पडताळणीपात्र झालेल्या अर्ज व कागदपत्रांची पडताळणी जिल्हा समिती करते. या समितीत अध्यक्ष जिल्हाधिकारी, सदस्य सचिव म्हणून उत्पादन व शुल्क विभागाचे अधीक्षक, जि. प. मुख्य कार्यकारी अधिकारी व पोलीस अधीक्षकांचा समावेश असतो. परवाना नुतनीकरणासाठी या समितीचा निर्णय अंतिम असतो.
मद्यविक्रीसाठी परवान्यांचे प्रकार किती ?राज्यात मद्य विक्रीसाठी चार प्रकारचे परवाने दिले जातात. यामध्ये एफएल (फॉरेन लिकर) विदेशी मद्य, एफएल- (बीआर बीअर) विदेशी मद्य बीअर, नमुना ई २ म्हणजे वाईनसाठीचा परवाना आणि सीएल (कंट्री लिकर) देशी दारू आदींचा समावेश आहे. राज्य शासनाने या चार प्रकारातही आणखी उपप्रकार पाडले आहेत.
जिल्ह्यात सीएल, एफएल ३, ४ च्या परवान्यांची संख्या अधिक चंद्रपूर जिल्ह्यात १०९ देशी दारू दुकाने, २४ वॉईन शॉप, ३२० वॉईन बार आणि १० बीअर शॉपी सुरू होते. वरील चार प्रकारातही पुन्हा एफएल -२, एफएल-३, एफएल- ४, एफएल बीआर -२, नमुना ई २ सीएल ३ आणि सीएल-एफएल टीओडी ३ असे प्रकार पाडण्यात आले आहेत. सीएल ३ आणि एफएल- २ वर शासनाने बंदी घातली. चंद्रपुरात सीएल (कंट्री लिकर) व एफएल -३ आणि -४ ची संख्या अधिक होती. जुन्या परवान्यांचे नुतनीकरण करताना कोणते प्रकार राहणार याबाबत सध्यातरी काही सांगता येत नाही, अशी माहिती एका जुन्या परवाधारक मद्य विक्रेत्याने ‘लोकमत’ ला दिली.