नागभीड (जि. चंद्रपूर) : गाढ झोपेत असलेल्या कुटुंबासाठी कुटुंबप्रमुखच काळ ठरला. मुलगा पहाटे घराबाहेर पडताच वडिलांनी कुऱ्हाडीने झोपेत असलेल्या दोन मुली आणि पत्नीवर घाव घालून हत्या केली. नागभीड तालुक्यातील मौशी गावातील ही घटना आहे. पोलिसांनी आरोपी अंबादास लक्ष्मण तलमले (४६) याला अटक केली आहे.
शनिवारी रात्री पती-पत्नीमध्ये आर्थिक परिस्थितीवरून कडाक्याचे भांडण झाले. यातूनच अंबादासने हे टोकाचे क्रूर पाऊल उचलल्याची प्राथमिक माहिती आहे. आरोपीची पत्नी अलका अंबादास तलमले (४२), मुलगी प्रणाली अंबादास तलमले (२२) व तेजस्विनी अंबादास तलमले (२०) अशी मृतकांची नावे आहेत. मुलगा अनिकेत (१६) हा पहाटे साडेचारच्या सुमारास कामानिमित्त घराबाहेर गेल्याने बचावला. पत्नी आणि दोन मुलींची हत्या केल्यानंतर आरोपी अंबादास हा घरीच बसून होता.