घुग्घुस : येथील साईनगरमधील राधाकृष्ण मंदिर परिसरातील पाऊल नारायण जंगम यांच्या घरी कोणीही नसल्याचा फायदा घेत भरदिवसा घरात प्रवेश करून घरातील कपाटाचे कुलूप तोडून तीन लाख ८१ हजार ५०० रुपयांचा ऐवज अज्ञात चोरट्यांनी लंपास केला. ही घटना शनिवारी दुपारी घडली.
साईनगरमधील पाऊल जंगम हे वेकोलिचे कर्मचारी असून, ते कर्तव्यावर गेले होते. त्याची पत्नी बाहेर गेली, तर दोन वाजता मुलगाही काही कामानिमित्त घराबाहेर गेला होता. घरी कोणी नसल्याची संधी साधून अज्ञात चोरट्यानी घरात प्रवेश करून आतील कपाटाचे कुलूप तोडून कपाटातील सोन्या-चांदीचे दागिने व रोख ५३ हजार असा एकूण तीन लाख ८१ हजार ५०० रुपयांचा ऐवज लंपास केला. त्यांनी घुग्गुस पोलीस स्टेशन गाठून तक्रार दिली.
फिर्यादीच्या तक्रारी अज्ञात चोरट्याविरुद्ध कलम ४५४, ३८० गुन्हा नोंद करून गुन्हे शोध पथकाचे सहायक फौजदार गौरीशंकर आमटे, सचिन बोरकर, महेंद्र वन्नकवार, सुधीर मत्ते, रंजित भुरसे, मनोज धकाते, प्रकाश करमे, सचिन डोहे, रवी वाभीटकर नितीन मराठे यांनी घटनास्थळाची पाहणी केली. घटनेचा पुढील तपास पो.नि. राहुल गांगुर्डे यांच्या मार्गदर्शनात सहा.पो.नि. संजय सिंग कसून तपास करीत आहेत.