भाजपाला सर्वात मोठा फटका! चंद्रपूर महापालिकेत होणार सत्तापालट?; काँग्रेसचा दणदणीत विजय

चंद्रपूर महापालिकेच्या ६६ जागांपैकी भाजपाला २३ जागा शिंदेसेनेला १ जागा तर अजित पवारांच्या राष्ट्रवादीला २ जागा मिळाल्या आहेत

चंद्रपूर - राज्यातील २९ महापालिकांचा निकाल हळूहळू स्पष्ट होऊ लागले आहेत. त्यात बहुतांश महापालिकेत भाजपाचं वर्चस्व सिद्ध झाले आहे. परंतु विदर्भातील चंद्रपूर महापालिकेत भाजपाची सत्ता उलथावून लावण्यात काँग्रेसला यश आले आहे. चंद्रपूर महापालिकेसाठी ५६.८९ टक्के मतदान झाले होते. त्यात १७ प्रभागातील ६६ नगरसेवकपदासाठी निवडणूक झाली. मात्र या निवडणुकीत भाजपाचे नेते सुधीर मुनगंटीवार, भाजपा आमदार किशोर जोरगेवार यांना धक्का बसला आहे. याठिकाणी काँग्रेस आणि भाजपाच्या थेट लढाईत काँग्रेसने बाजी मारली आहे.

चंद्रपूर महापालिकेच्या ६६ जागांपैकी भाजपाला २३ जागा शिंदेसेनेला १ जागा तर अजित पवारांच्या राष्ट्रवादीला २ जागा मिळाल्या आहेत. या महापालिकेत काँग्रेस ३० जागांवर पुढे आहे तर उद्धव ठाकरेंचा पक्षही ६ जागांवर आघाडीवर आहे. त्यामुळे इतरांच्या मदतीने चंद्रपूरात काँग्रेस महापालिकेत सत्ता पालट करण्याच्या दिशेने वाटचाल करत आहेत. चंद्रपूर महापालिकेत पहिल्यांदाच उद्धवसेनेचे ६ नगरसेवक निवडून आले आहेत. 

पाच शहरात काँग्रेसचा महापौर - काँग्रेस

तर महानगरपालिका निवडणुकीत काँग्रेस पक्षाला मिळालेले यश समाधानकारक नसले तरी यश अपयशाची पर्वा न करता आम्ही वैचारिक लढाई लढलो. जनतेचा विश्वास व कार्यकर्त्यांचा निर्धाराचा लढा या जोरावर काँग्रेस पक्ष राज्यातील सर्वात मोठा विरोधी पक्षाच्या भूमिकेत दिसत आहे. पाच शहरात काँग्रेसचा महापौर तर ३५० नगरसेवक आणि १० ठिकाणी सत्तेत सहभागी होऊ असे चित्र आहे अशी प्रतिक्रिया प्रदेशाध्यक्ष हर्षवर्धन सपकाळ यांनी म्हटलं आहे.

दरम्यान, संक्रातीच्या पर्वावर महानगरपालिकेच्या निवडणुका झाल्या. काँग्रेस राज्यात दुसऱ्या क्रमांकाचा पक्ष बनला आहे. जेथे शक्य आहे तेथे स्वबळावर तर काही ठिकाणी आघाडी करून काँग्रेस पक्षाने वैचारिक व संघटनात्मक वाढीसाठी निवडणूक लढली. सत्ताधारी भाजपा महायुतीने पैशाचा प्रचंड वापर केला, बोगस मतदान झाले, कुठलीही तडजोड न करता भाजपाच्या बुलडोझरसमोर काँग्रेस कार्यकर्ता निर्धाराने उभा राहिला. हा कार्यकर्त्यांचा विजय असून लढणाऱ्या कार्यकर्त्यांचा सार्थ अभिमान आहे असंही हर्षवर्धन सपकाळ यांनी म्हटलं.