चंद्रपूर : येथील काँग्रेससोबत एकनिष्ठ असलेले ८६ वर्षीय कार्यकर्ते केशव आवारी हे मागील अनेक वर्षांपासून शेगाव येथील गजानन महाराज मंदिरात राहुल गांधी पंतप्रधान व्हावे यासाठी अभिषेक करीत आहेत. वाढत्या वयामुळे ते आता शेगाव येथे जाऊ शकत नसले तरी ते दरवर्षी मनी ऑर्डर आणि शेगाव येथील मंदिर प्रशासनाला पत्र पाठवून राहुल गांधी यांच्या नावाने अभिषेक करण्याची विनंती करतात. यावर्षीही त्यांनी ही विनंती केली आहे.
सध्या राहुल गांधी भारत जोडो यात्रेदरम्यान विदर्भात आहेत. त्यामुळे एकदा त्यांना भेटण्याची इच्छा आवारी यांनी व्यक्त केली आहे. काँग्रेससोबत असलेल्या निष्ठेतून यशवंतराव चव्हाण, इंदिरा गांधी, राजीव गांधी, सोनिया गांधी आणि आता राहुल गांधी यांच्यासोबत केशव आवारी यांनी आजवर अनेकवेळा पत्रव्यवहार केला आहे. या सर्व पत्रांचे उत्तरसुद्धा त्यांना आले आहे. विशेष म्हणजे, आलेले प्रत्येक पत्र त्यांनी आजपर्यंत जपून ठेवले आहे.
गजानन महाराजांचे भक्त असलेले आवारी हे जन्मताच दिव्यांग आहेत. असे असले तरी राहुल गांधी देशाचे पंतप्रधान व्हावे यासाठी ते मागील अनेक वर्षांपासून न चुकता शेगाव येथे जाऊन अभिषेक करतात. मागील काही वर्षांत त्यांनी मनिऑर्डरद्वारे अभिषेक केला आहे. यावर्षी मंदिर प्रशासनाकडून मिळालेला प्रसाद तसेच दुपट्टा राहुल गांधी यांना देण्याची त्यांची इच्छा आहे. मात्र वाढत्या वयामुळे त्यांची भेट होणे कठीण आहे. असे असले तरी त्यांची इच्छा पूर्ण करण्यासाठी महाराष्ट्र प्रदेश काँग्रेस समिती ओबीसी विभागाचे राज्य उपाध्यक्ष उमाकांत धांडे यासाठी प्रयत्न करीत आहेत.
युवक काँग्रेसपासून जुळले पक्षात
केशव आवारी हे युवक काँग्रेसच्या माध्यमातून पक्षाशी जुळले. अक्षर सुधारक म्हणूनही त्यांची ओळख आहे. त्यांनी चालविलेल्या वर्गातून अनेक जणांचे अक्षर सुबक आणि वळणदार झाले आहे. शेगाव देवस्थानमार्फत चालविल्या जाणाऱ्या शाळेतदेखील त्यांनी विद्यार्थ्यांकरिता अक्षर सुधार वर्ग घेतले आहेत.
आजही खादीचेच कपडे
महात्मा गांधी, जवाहरलाल नेहरु, साध्वी प्रीतीसुधाजी यांच्या विचारांचा त्यांच्यावर प्रभाव आहे. त्यामुळे त्यांनी आयुष्यभर खादी कपड्याशिवाय दुसरे कोणतेही कपडे वापरले नाहीत.