मलकापूर: अज्ञात वाहनाच्या धडकेत मोटार सायकलस्वार युवक जागीच ठार झाला. तर पाठीमागे बसलेली त्याची आई गंभीर जखमी झाली. ही घटना मलकापूरनजीक राष्ट्रीय महामार्ग क्रमांक ६ वरील वीज वितरण कंपनीच्या उप केंद्रासमोर शनिवारी सकाळी ८.४० वाजता घडली.
जळगाव खांदेश जिल्ह्यातील चिंचाळा येथील ऋषीकेश लक्ष्मण करनाटके (१९) आणि त्याची आई बेबीबाई लक्ष्मण करनाटके (५६) दोघे मोटारसायकल क्रमांक एम.एच १९ एन ४8२ या मोटारसायकलीने चिंचाळा ता. यावलकडे निघाले होते. दरम्यान, राष्ट्रीय महामार्गावरील वीज वितरण कंपनीच्या उपकेंद्रासमोर त्यांच्या मोटार सायकलीला अज्ञात वाहनाने धडक दिली. यात बेबीबाई डाव्या बाजूला फेकल्या गेल्याने गंभीर जखमी झाल्या. तर ऋषीकेश करनाटके हा तरूण उजव्या बाजूला रस्त्याच्या मधोमध फेकल्या गेला. विरूध्द दिशेने भरधाव वाहनाने त्याला चिरडले. त्याच्या डोक्याचा अक्षरशा चेंदामेंदा होवून तो जागीच ठार झाला. घटनास्थळी पोलिसांनी व नागरिकांनी धाव घेतली. उपजिल्हा रुग्णालयाचे डॉ. गुलाबराव गायकवाड व सहकाºयांनी तात्काळ घटनास्थळ गाठले. गंभीर जखमी बेबीबाई करनाटके यांना उपचारार्थ उपजिल्हा रूग्णालयात हलविले. तेथे त्यांच्यावर उपचार सुरू असून त्यांची प्रकृती धोक्याबाहेर आहे. पुढील तपास मलकापूर पोलिस करीत आहेत.