मेहकर तालुक्यात पाणीटंचाईचा दरवर्षी एक बळी

नियोजनाअभावी पाणीटंचाईचे भयानक चित्र

उद्धव फंगाळलोकमत न्यूज नेटवर्कमेहकर : उन्हाळ्यामध्ये दरवर्षी मेहकर तालुक्यात अनेक गावामध्ये तीव्र स्वरुपाची पाणीटंचाई निर्माण होत आहे. पाणीटंचाई निवारण्यासाठी संबंधीत विभागाकडून पाणीटंचाईचा कृती आराखडा दरवर्षी तयार करण्यात येतो. परंतु तयार केलेल्या कृती आराखड्यानुसार प्रत्यक्षात कामे होतांना दिसत नाही. नियोजनाअभावी मेहकर तालुक्यात पाणीटंचाईचे भयानक चित्र निर्माण होत आहे.तीव्र पाणीटंचाईमुळे मेहकर तालुक्यात दरवर्षी १ बळी जात आहे. मात्र संबंधीत विभागाकडून पाणीटंचाईचा प्रयत्न गंभीरतेने घेतल्या जात नाही. मेहकर तालुक्यात जवळपास १४० गाव येतात. त्यापैकी जवळपास ८० ते ८५ गावात पाणीटंचाईचा कृती आराखडा तयार करण्यात येतो. या कृती आराखड्याला मंजुरात मिळाल्यानंतर त्यावर अंमलबजावणी सुरु होते. परंतु प्रत्यक्षात पाणी टंचाईचे नियोजन बरोबर नसल्याने अनेक गावामध्ये पाणीटंचाईचे भयानक चित्र निर्माण होत आहे. तर मागील वर्षी पाणीटंचाईमुळे एका विद्यार्थ्याला आपले प्राण गमवावे लागले. तर यावर्षी सुद्धा एका महिलेला पाण्यामुळेच आपला जीव गमवावा लागला. अशा बिकट परिस्थितीत संबंधीत विभागाचे अधिकारी ज्या गावात घटना घडली त्या गावात जाऊन केवळ औपचारिकता पूर्ण करुन कागदोपत्री पाणीटंचाई निवारण्याचा अहवाल तयार करुन वरिष्ठांना पाठवितात. तर वरिष्ठ अधिकारी सुद्धा कागदावरचा अहवाल पाहून घडत असलेल्या प्रकाराकडे दुर्लक्ष करतात. अधिकाऱ्यांच्या या कागदी घोड्यांमध्ये मात्र ग्रामीण भागातील गोरगरीब जनता भरडल्या जात आहे. पाणीटंचाईवर मेहकर तालुक्यात दरवर्षी लाखो रुपये खर्च करण्यात येतात. पाणीटंचाईसाठी शासन लाखो रुपये देत असतांना पाणीटंचाई निर्माण होते कशी, लाखो रुपये जातात कुठे? असा प्रश्न उपस्थित होत आहे. अधिकाऱ्यांच्या या वेळकाढू धोरणामुळे मात्र गरीबांचे दरवर्षी हाल होत आहेत. पाणीटंचाईचे दोन वर्षात दोन बळीमेहकर तालुक्यात दरवर्षी तीव्र स्वरुपाची पाणीटंचाई निर्माण होत आहे. पाणीटंचाई निवारण्यासाठी वरिष्ठ पातळीवरुन उपाययोजना करण्यात येतात. मात्र स्थानिक विभागाच्या नियोजन शुन्य कारभारामुळे पाणीटंचाईचे भयानक चित्र तयार होत आहे. तर याच पाणीटंचाईमुळे २०१६ मध्ये दादुलगव्हाण येथील महेश देवानंद शेजुळ या १२ वर्षीय विद्यार्थ्याचा पाणी भरताना विहिरीत पडून मृत्यू झाला होता. तर यावर्षी २०१७ मध्ये पार्डी येथील सावित्री सहदेव होगे या महिलेचा विहिरीत पडून मृत्यू झाला आहे. त्यामुळे सतत दोन वर्षात पाणीटंचाईमुळे दोन जणांना आपला जीवन गमवावा लागला आहे.कायम पाणीटंचाई निवारण योजना गायबगेल्या काही वर्षापासून मेहकर तालुक्यात पाणीटंचाईची समस्या वाढतच आहे. त्यामुळे काही गावातील पाणी समस्या कायमची दूर करण्यासाठी अनेक गावामध्ये महाजल, जलस्वराज राष्ट्रीय पेयजल योजना राबविण्यात आल्या आहेत. या योजनांवर शासनाने कोट्यावधी रुपये खर्च केला आहे. परंतु ज्या-ज्या गावात ही योजना राबविण्यात आली त्या गावाची पाणी समस्या आजरोजी कायमच आहे. निकृष्ट व अर्धवट कामामुळे या योजनांचा बट्टयाबोळ झाला आहे. त्यामुळे या योजनांची कामे करणारे ठेकेदार व संबंधीत अधिकारी यांची चौकशी करुन कठोर कारवाईची गरज निर्माण झाली आहे.५९ गावात तीव्र पाणीटंचाईमेहकर तालुक्यात ५९ गावामध्ये तीव्र पाणीटंचाई जाणवत असून, ४९ विहिरी अधिग्रहीत केल्या आहेत. तर ८ गावामध्ये सध्या टँकरने पाणीपुरवठा सुरु आहे. पाणी टंचाईचे भयानक चित्र तालुक्यात पहायला मिळत असून, नियोजनाअभावी नागरिकांचे पाण्यासाठी हाल होत आहेत.