शेगाव (बुलडाणा) : विहिरीतील मोटरपंपांची चोरी करून ती शहरातील चोरट्यांनी भंगार व्यावसायिक काँग्रेसचे माजी नगरसेवक शेख नईम शेख जमाल यांना विक्री केल्याने पोलिसांनी त्यांनाही अटक केली. न्यायालयाने त्यांची न्यायालयीन कोठडीत रवानगी केली आहे.
शेगावातील फुलेनगर परिसरातील अतुल गोपाल कलोरे यांनी त्यांच्या शेतातील विहिरीतील तीन अश्वशक्तीची विद्युत मोटर चोरीस गेल्याची तक्रार पोलिसात दिली होती. त्यानुसार शहर पोलिसांनी गुन्हा दाखल केला. तपासात तीन पुतळा परिसर, नागझरी रोड या परिसरात राहणारे सुमित ऊर्फ आयकोन्या समदूर, शैलेंद्र सुरडकर यांना अटक केली. चौकशीमध्ये त्यांनी चोरीची मोटर शहरातील भंगार व्यावसायिक तथा काँग्रेसचे माजी नगरसेवक शेख नईम शेख जमाल यांना विकल्याचे सांगितले. यानंतर पोलिसांनी शेख नईम शेख जमाल (वय ३९, रा. अताऊल्ला चौक, शेगाव) याची विचारपूस केली. मोटर पोलिसांसमोर हजर केल्याने त्याला अटक केली. त्याला न्यायालयासमोर उपस्थित केले असता, न्यायालयीन कोठडीमध्ये पाठविले. माजी नगरसेवकाविरोधात चोरीची मोटर घेतल्याप्रकरणी गुन्हा दाखल झाल्याने शहरात खळबळ उडाली आहे. शहरात यापूर्वीही अनेक भंगार चोरीच्या घटना घडलेल्या आहेत. त्याचाही पोलिसांनी आता तपास करण्याची गरज आहे. अधिक तपास गुन्हे शोध पथकाचे गणेश वाकेकर करीत आहेत.