गोठ्याला लागलेल्या आगीत पाच जनावरे दगावली

आग लागताच काही जनावरे दोर तोडून गोठ्यातून बाहेर पडली. मात्र २ गायी व ३ बैलांचा आगीत होरपळून मृत्यू झाला.

खामगाव: तालुक्यातील हिवरा बु. येथील एका शेतकऱ्याच्या गोठ्याला आग लागून पाच जनावरे दगावली. तर पाच जनावरे गंभीर जखमी झाली. बुधवारी सकाळी साडे नऊ वाजता दरम्यान ही घटना घडली.

याबाबत सविस्तर असे की, खामगाव तालुक्यातील हिवरा बु. गाव शिवारालगत असलेल्या ज्ञानेश्वर पुंडलिक हागे (३५) यांच्या गुरांच्या गोठ्याला सकाळी ९:३० वाजताच्या सुमारास अचानक आग लागली. आग लागताच काही जनावरे दोर तोडून गोठ्यातून बाहेर पडली. मात्र २ गायी व ३ बैलांचा आगीत होरपळून मृत्यू झाला. तर ३ म्हशी, १ गाय व १ बैल होरपळून गंभीर जखमी झाले आहेत. त्याचवेळी गोठ्यामधील गजानन हागे यांनी ठेवलेले ८ ते १० ट्रॉली कुटार जळून खाक झाले आहे. या आगीमध्ये सुमारे ५ लाखाचे नुकसान झाल्याचा प्राथमिक अंदाज व्यक्त होत आहे.