तांत्रिक कर्मचा-यांच्या रिक्त पदांमुळे एसटीला खोडा

बुलडाणा जिल्ह्यात २४९ पदे रिक्त; वर्कशॉपमध्ये दुरूस्तीसाठी बसेसच्या रांगा.

सिद्धार्थ आराख / बुलडाणा: राज्य परिवहन महामंडळाच्या बुलडाणा विभागातील सात आगारातील तांत्रिक कर्मचार्‍यांचे २४९ पदे रिक्त असल्यामुळे या रिक्त पदाचा फटका बसेस दुरूस्तीवर होत आहे. त्यातून प्रवासी वाहतुकीवर परिणाम होत आहे. महाराष्ट्र राज्य मार्ग परिवहन महामंडळाच्या बुलडाणा विभागात ४६३ बसेसच्या माध्यमातून प्रवासी वाहतूक केली जाते. अपुर्‍या व नादुरूस्त बसेसमुळे बहुतांश बसेस वारंवार दुरूस्त कराव्या लागतात; मात्र यासाठी लागणारे मनुष्यबळसुद्धा महामंडळाकडे पुरेसे नाही. बुलडाणा जिल्ह्यात एसटीचे सात आगारा आहेत. या आगारात असलेल्या वर्कशॉपला यांत्रिक कामगारांची तब्बल ६९१ पदे मंजूर आहेत. जिल्हा मुख्यालयी असलेल्या विभागीय कार्यशाळेत सर्वाधिक पदे आहेत. तथापि, जिल्ह्यात मंजूर असलेल्या ६९१ पदांपैकी २४९ पदे रिक्त असून, ४४२ कर्मचार्‍यांवरच एसटीचा गाडा हाकल्या जात आहे. या रिक्त पदांचा फटका बसेसच्या दुरूस्तीला बसत असून, या बसेस सुरळीत सुरू ठेवण्याचे आव्हान तोकड्या यंत्रणेवर पडत आहे. जिल्ह्यात बुलडाणा, चिखली, खामगाव, मेहकर, मलकापूर, जळगाव जामोद आणि शेगाव या सात तालुक्यात महामंडळाचे आगार आहेत. या सर्व आगाराला लागून ४६३ बसेसच्या माध्यमातून ४४८ शेड्युल चालविले जातात. यातील बहुतांश बसेस कालबाह्य झालेल्या आहेत. यामुळेच भररस्त्यावर गाड्या ब्रेकडाऊन होण्याचे प्रमाण वाढत आहे. सातही आगारांतील अनेक बसेस आपल्या फेर्‍या आटोपून परतल्या की दुरूस्तीसाठी वर्कशॉपला पाठविल्या जातात, यासाठी प्रत्येक आगाराला स्वतंत्र वर्कशॉप देण्यात आले आहे. शिवाय जिल्ह्याचे एकत्रित विभागीय कार्यशाळा बुलडाणा येथे आहे. या सात आगारांच्या वर्कशॉपमध्ये एकूण मेकॅनिकलची ६९१ पदे आहेत. यातील केवळ ४४२ कर्मचारी कार्यरत असून, २४९ पदे अद्यापही रिक्त आहेत. शिवाय बुलडाणा येथील विभागीय कार्यशाळेत तब्बल ४८ पदे रिक्त आहेत. २४९ मेकॅनिकल कमी असल्याने बसेसची दुरूस्ती करताना अधिकारी, कर्मचार्‍यांना चांगलीच दमछाक करावी लागते. विभागीय कार्यशाळा बुलडाणा येथे ४८ पदे रिक्त आहेत. या पाठोपाठ खामगाव आणि चिखली या मोठय़ा वर्कशॉपमध्ये प्रत्येकी १४ पदे रिक्त आहेत, तर मेहकर येथे २0 तर मलकापूर येथे १२ पदे रिक्त आहेत. जळगाव जामोद येथे ६ तर बुलडाणा येथील वर्कशॉपला १९ पदे रिक्त आहेत. जिल्ह्यात उपलब्ध असलेल्या ४६३ एस.टी बसेसपैकी शंभरावर बसेसची कालर्मयादा संपलेली असल्यामुळे या बसेस रस्त्यावर ब्रेकडावून होतात. मध्येच बंद होणार्‍या या बसेसमुळे प्रवासी त्रस्त झालेले आहेत. नादुरूस्त बसेसची संख्या मोठी असल्याने या बसेसला दररोज दुरूस्तीची गरज पडते. त्यामुळे एकाच वेळी अधिक बसेस दुरूस्तीला आल्यास अपुर्‍या मनुष्यबळाअभावी या बसेसला मुख्य वर्कशॉपमध्ये बुलडाणा येथे पाठविल्या जातात; पण येथेही मेकॅनिकलची संख्या कमीच असल्याने नादुरूस्त बसेस वेळेत दुरूस्त होत नाहीत. परिवहन महामंडळाचे विभाग नियंत्रक सुभाष पाटील यांच्याशी संपर्क साधला असता त्यांनी रिक्त पदांमुळे कामकाजावर काहीसा परिणाम होत असल्याचे स्विकारून ही रिक्त पदे भरली जावी, यासाठी पत्रव्यवहार सुरू असल्याचे सांगीतले.