नांदुरा पंचायत समिती कर्मचा-यांचे काम बंद

पदाधिकारी व अधिका-यांविरोधातील खोटे गुन्हे मागे घ्यावे यासाठी शिक्षक व कर्मचा-यांचे आंदोलन.

नांदुरा (बुलडाणा): नांदुरा पंचायत समितीच्या सभापती, उपसभापती, गटविकास अधिकारी, गटशिक्षणाधिकारी यांच्यावर अनुसूचित जाती-जमाती प्रतिबंधक कायद्यांतर्गत दाखल केलेले खोटे गुन्हे मागे घेण्यात यावे, या मागणीकरिता पं.स. अंतर्गत येणार्‍या शिक्षकांनी तथा सर्व विभागाच्या कर्मचार्‍यांनी १९ जानेवारी रोजी काम बंद आंदोलन केले. माहिती मागितली म्हणून मारहाण करून जातीवाचक शिवीगाळ केल्याच्या महासेन राजाराम सुरळकर यांनी दिलेल्या तक्रारीवरून नांदुरा पोलिसांनी काल पं.स. सभापती, उपसभापतीपती, गट विकास अधिकारी, गटशिक्षणाधिकारी व इतरांविरुद्ध विविध कलमान्वये दाखल केलेले खोटे गुन्हे मागे घेण्यात यावे, या मागणीसाठी आज सदर आंदोलन करण्यात आले. यावेळी सर्व कर्मचार्‍यांनी पं.स. आवारात बसून निषेध व्यक्त करण्याकरिता सभा सुरू केली असता या सभेला जि.प. सदस्य बलदेवराव चोपडे, वसंतराव भोजने, पं.स. सदस्य जयप्रसाद जाधव, गणेश भोपळे, प्रसाद जवरे, भारिप-बमसंचे राजरत्न तायडे, धनगर समाजाचे जिल्हाध्यक्ष शत्रुघ्न पाचपोर, सुनील पाटील व अनेकांनी उपस्थिती दर्शवून आपला पाठिंबा व्यक्त केला. तर ठाणेदार साळुंके यांनी या सभेला भेट देऊन सदर प्रकरणात चौकशी होऊनच कार्यवाही होईल. त्यामुळे होणार्‍या चौकशीत सहकार्य करण्याचे आवाहन करीत कोणावरही अन्याय होणार नाही असे सांगितले. यावेळी तालुका आरोग्य संघटना, पं.स. कर्मचारी संघटना, जि.प.कर्म. महासंघ, तालुका ग्रामसेवक संघटना, जिल्हा ग्रामसेवक युनियन, म.रा. प्राथ. शिक्षक संघटनेच्या प्रमुखांनी ठाणेदार साळुंके यांना गुन्हे मागे घेण्याबाबत निवेदन दिले, अन्यथा काम बंद आंदोलन पुढेही सुरू राहील, असा इशारा दिला. या दरम्यान उपविभागीय पोलीस अधिकारी रुपाली दरेकर यांनी या प्रकरणातील १0५ मुख्याध्यापकांच्या चौकशीस पं.स.च्या कृषी विभागात प्रारंभ केला होता. वृत्त लिहीपर्यंत सदर चौकशी सुरू होती.