लाखांदूर : राष्ट्रीय आरोग्य अभियानांतर्गत चार वर्षांपूर्वी बांधण्यात आलेल्या तालुक्यातील कुडेगाव प्राथमिक आरोग्य केंद्राचे फ्लोरिंग उखडल्याचा प्रकार उघडकीस आला आहे. बांधकामात गैरव्यवहार झाल्याने फ्लोरिंग उखडल्याचा आरोप नागरिक करीत आहेत. लाखांदूर तालुक्यातील कुडेगाव येथे २०१६ मध्ये प्राथमिक आरोग्य केंद्राच्या इमारतीसह आरोग्य कर्मचाऱ्यांच्या सदनिकांचे बांधकाम केले होते. सदर बांधकाम निकृष्ट होत असल्याचा आरोप त्यावेळीही करण्यात आला होता. मात्र, त्यावेळी कुणी लक्ष दिले नाही. आता आरोग्य केंद्रातील अनेक कक्षातील फ्लोरिंग उखडले असून टाईल्स बाहेर आल्या आहेत. फ्लोरिंग करताना टाईल्सखाली पुरेशा प्रमाणात मातीचा भराव न झाल्याने आणि त्यावरच सिमेंट काँक्रीटने बांधकाम केल्याने फ्लोरिंग उखडल्याचे दिसून येत आहे. विशेष म्हणजे, यापूर्वीदेखील या इमारतीची दुरुस्ती करण्यात आल्याची माहिती आहे. अल्पावधीतच पुन्हा फ्लोरिंग उखडल्याने ही इमारत वादाच्या भोवऱ्यात सापडली आहे.
रुग्णालयात येणाऱ्या रुग्णांना उखडलेल्या फ्लोरिंगचा त्रास सहन करावा लागतो. अनेकदा त्यात पाय अडकून अनेक जण पडतात. नातेवाईकांनाही मनस्ताप सहन करावा लागत आहे. या प्रकरणाची तात्काळ दखल घेऊन सदोष इमारत बांधकाम करणाऱ्या कंत्राटदारासह अभियंत्यावर कारवाई करावी तसेच दोषी अधिकारी शोधून त्यांच्यावरही कारवाई करण्याची मागणी केली जात आहे. आधीच भंडारा रुग्णालयातील अग्निकांडाने संपूर्ण जनता हादरुन गेली आहे. यानंतर आरोग्य यंत्रणा सुधारेल अशी अपेक्षा होती. परंतु, कुडेगाव आरोग्य केंद्रातील फ्लोरिंग उखडण्याचा प्रकार पाहता कोणतीही सुधारणा दिसून येत नाही.