अखेर ‘त्या’ प्रकरणातील बालकाचा मेडिकलमध्ये मृत्यू

नुकतीच ग्रामपंचायत निवडणूक घेण्यात आली होती या निवडणुकीत अनेक गावांत परवानगी नसतानाही उमेदवारांनी विजयी मिरवणूक काढली. दहेगाव येथे सुद्धा दोन्ही गटांच्या उमेदवारांनी १८ जानेवारीला सायंकाळीू ६ वाजण्याच्यादरम्यान विजयी मिरवणूक काढली. एका रस्त्यावर दोन्ही मिरवणूक समोरासमोर आल्यावर त्यांच्यात वाद झाला. या वादात तेजस गोमासे (१७) या मुलाच्या डोक्याला दुखापत होऊन तो गंभीर जखमी झाला होता. त्याला तत्काळ मोहाडी येथील एका खासगी दवाखान्यात नेण्यात आले. मात्र, डोक्याला मार असल्याने त्याला नंतर भंडारा व नागपूर येथील शासकीय वैद्यकीय महाविद्यालयात भरती करण्यात आले होते. या घटनेची तक्रार तब्बल दहा दिवसांनंतर २७ जानेवारीला पोलिसांत करण्यात आल्यावर पोलिसांनी कलम ३०७, १४३,१४७,१४९ भादंविनुसार गुन्हा नोंद करून आरोपी विपुल कडव (३०), नितीन राखडे (२५), गौरी सेलोकर (३१), रघुनाथ कडव (३०), नितीन कडव (२५) या पाच युवकांना अटक केली होती. मात्र, उपचारा दरम्यान दोन फेब्रुवारीला तेजसचा मृत्यू झाल्याने आरोपी विरुद्ध कलम ३०२ सुध्दा लावण्यात येणार आहे. या प्रकरणाचा तपास पो. नि. राहुल गायकवाड यांच्या मार्गदर्शनात पोलीस उपनिरीक्षक आर. गायकवाड, अंमलदार मयूर सिंगनजुडे हे करत आहेत.