Shravan 2023: चातुर्मासातील महत्त्वाचा मानला गेलेला महिना म्हणजे श्रावण. यंदाच्या वर्षी श्रावण महिना अधिक आला होता. अधिक मासाची सांगता झाल्यानंतर आता निज श्रावणाला सुरुवात होत आहे. निज श्रावण महिन्यात व्रत-वैकल्ये, सण-उत्सव साजरे केले जाणार आहेत. १७ ऑगस्ट २०२३ पासून निज श्रावण महिन्याला प्रारंभ होत असून, १५ सप्टेंबर २०२३ पर्यंत निज श्रावण महिना असणार आहे. श्रावणातील प्रत्येक दिवसाला वेगळे महत्त्व आहे. सप्ताहातील सातही दिवस वेगवेगळी व्रते आचरली जातात. या काळात महादेवाची पूजा केल्याने सर्व इच्छा पूर्ण होतात अशी मान्यता आहे. विशेषत: श्रावण महिन्यातील सोमवारी केलेली पूजा आणि व्रत याचे तत्काळ फळ मिळते असे मानले जाते. यंदाच्या श्रावणात किती श्रावणी सोमवार आहेत? कोणत्या श्रावणी सोमवारी कोणती शिवामूठ वाहावी? जाणून घेऊया... (shravan maas 2023 date and time)
पृथ्वीने नवीन गालीचा ओढळ्याचा काळ म्हणजे श्रावण. नाविन्याची चाहूल म्हणजे श्रावण. श्रावणात आपल्या संस्कृती, परंपरा, सण-उत्सव यांची अगदी रेलचेल असते. वातावरणात थंडावा आलेला असतो. जिथे पाहावे, तिथे धरणी माता नवचैतन्याने न्हाऊन निघत असते. श्रावणातील व्रते म्हणजे केवळ वैयक्तिक मोक्ष साधनेचे मार्ग नाहीत. अतिशय तरलपणे काहीतरी शिकवण देणारी किंवा एकमेकांतील नाते संबंध जपणारी, ती वृद्धिंगत करणारी एक भावनिक; पण विशिष्ट नियमात जगणारी अमृत महिरप आहे ती. श्रावण महिना पूर्वी ‘नभस्’ या नावाने ओळखला जात असे. या महिन्यात रात्रीच्या प्रारंभी पूर्वेला श्रवण नक्षत्र उगवते आणि रात्रभर आकाशात राहून पहाटे पश्चिमेस मावळते. तसेच श्रावण पौर्णिमेला चंद्र श्रवण नक्षत्रापाशी असतो. म्हणून या महिन्याला ‘श्रावण’ असे नाव मिळाले आहे. (shravani somwar 2023)
शिवपूजनासाठी सर्वोत्तम श्रावण मास
श्रावण हा महादेवांचे पूजन, नामस्मरण, उपासना करण्यासाठी सर्वोत्तम मानला गेल्यामुळे श्रावणातील प्रत्येक सोमवारला विशेष महत्त्व प्राप्त होते. श्रावणी सोमवारी महादेव शिवशंकरावर जलाभिषेक, दुग्धाभिषेक, रुद्राभिषेक मोठ्या प्रमाणावर केला जातो. प्रत्येक सोमवारी महादेवावर वाहिल्या जाणाऱ्या शिवामूठीचे महत्त्वही वेगळे आहे. (shivamuth to offer on sawan somvar 2023)
सन २०२३ मधील श्रावणी सोमवार आणि शिवामूठ
पहिला श्रावणी सोमवार: २१ ऑगस्ट २०२३ रोजी पहिला श्रावणी सोमवार आहे. या दिवशी शिवपूजन झाल्यानंतर तांदूळ शिवामूठ म्हणून वाहावे, असे सांगितले जाते.
दुसरा श्रावणी सोमवार: २८ ऑगस्ट २०२३ रोजी दुसरा श्रावणी सोमवार आहे. या दिवशी महादेव शिवशंकरांची पूजा झाल्यानंतर शिवामूठ म्हणून तीळ वाहावे, असे सांगितले जाते. विशेष म्हणजे या दिवशी सोमप्रदोष आहे.
तिसरा श्रावणी सोमवार: ०४ सप्टेंबर २०२३ रोजी तिसरा श्रावणी सोमवार आहे. या दिवशी शिवपूजन झाल्यानंतर शिवामूठ म्हणून मूग वाहावे, असे सांगितले जाते.
चौथा श्रावणी सोमवार: ११ सप्टेंबर २०२३ रोजी चौथा श्रावणी सोमवारी आहे. या दिवशी महादेव शिवशंकरांची पूजा झाल्यानंतर शिवामूठ म्हणून जव वाहावे, असे सांगितले जाते.