चोरट्यांचा बँकेची तिजोरी फोडण्याचा प्रयत्न फसला

तिजोरी फोडण्याचा प्रयत्न फसलेल्या चोरट्यांनी बँकेत इतरत्र सीसीटीव्हीसह तोडफोड केली व ते सीडीआर घेऊन पसार झाले.

ठळक मुद्देगेवराई तालुक्यातील घटनातलवाड्यात साईराम अर्बन बँकेचे शटर तोडले

गेवराई (जि. बीड) : तालुक्यातील तलवाडा येथील ग्रामपंचायतीच्या सचिवालयातील श्री साईराम अर्बन बँकेचे शटर तोडून बँकेतील तिजोरी फोडण्याचा चोरट्यांचा प्रयत्न फसला. ही घटना मंगळवारी मध्यरात्री घडली.

तिजोरी फोडण्याचा प्रयत्न फसलेल्या चोरट्यांनी बँकेत इतरत्र सीसीटीव्हीसह तोडफोड केली व ते सीडीआर घेऊन पसार झाले. येथील सुरक्षा रक्षक कोरोना पॉझिटिव्ह असल्यामुळे ते ड्युटीवर नव्हते. बाहेरच्या शटरच्या बाजूने दोन सीसीटीव्ही कॅमेरे बँकेने लावलेले होते. त्यातील एक कॅमेरा चोरट्यांनी तोडून शटरच्या बाजूने फेकला. चोरांनी बाजूच्या संगणक केंद्राचादेखील दरवाजा तोडून लॅपटॉप लंपास केला. ही बाब सकाळी बँकेत आल्यानंतर कर्मचाऱ्यांना कळाली. कर्मचाऱ्यांनी तातडीने घटनेची माहिती तलवाडा पोलीस ठाण्याचे सहायक पोलीस निरीक्षक प्रताप नवघरे यांना दिली. ते घटनास्थळी तत्काळ दाखल झाले. नवघरे यांनी बीडहून फिंगर प्रिंट पथक बोलावून तपासणी केली आहे. सीसीटीव्ही कॅमेरे फुटेज तपासण्यास सुरुवात केली आहे.