शंभो, लागली तुझी आस, उघड दार देवा - A

बीड : कोरोना संसर्गाच्या पार्श्वभूमीवर शासनाच्या निर्देशांनुसार मंदिरे अद्यापही बंद आहेत. जिल्ह्यासह शहरातील मंदिरे बंद असल्याने भाविकांची कुचंबना होत आहे. लॉकडाऊनचे निर्बंध शिथिल होत असले तरी मंदिरे उघडण्याबाबत अद्याप निर्णय झालेला नाही. त्यामुळे बीड शहराचे ग्रामदैवत कंकालेश्वर आणि ग्रामदेवता खंडेश्वरी मातेसह इतर मंदिरांमध्ये दर्शन करायला कधी मिळणार, याची आस भक्तांना लागली आहे.

मंदिरे बंद असल्याने पुजारी, परिसरात पान-फुले, नारळ, पूजेचे साहित्य विकणाऱ्या छोट्या व्यावसायिकांसह शहरांतर्गत प्रवासी सेवा देणाऱ्या रिक्षाचालकांनाही आर्थिक फटका बसला आहे. लॉकडाऊन शिथिल केल्याने दुकाने, हॉटेल ठरावीक वेळेसाठी उघडल्याने दिलासा मिळाला असला तरी दिनचर्येनुसार आपली श्रद्धा अर्पित करण्यासाठी मंदिराचे द्वार बंदच आहे. बीड शहरात असलेले तेराव्या शतकातील कंकालेश्वर मंदिर हेमाडपंथी असून भग्व ऋषींनी उभारलेले स्वयंभू मंदिर बीडकरांच्या आस्थेचे प्रतीक आहे. कोरोनाच्या आदी येथे दररोज किमान ३०० भाविक स्थानिक तसेच ज्योतिर्लिंग दर्शन व पर्यटन करणारे ५०-६० पर्यटक बीडमधील कंकालेश्वर मंदिर पाहण्यासाठी व दर्शनासाठी थांबतात. इतिहासाची साक्ष देणारे हे मंदिर शाळकरी मुलांच्या सहलीत समाविष्ट असते. मात्र सोळा महिन्यांपासून मंदिराची द्वारे बंद आहेत; तर यावर अवलंबून असणारे व्यावसायिक आणि भाविकांचे मंदिर कधी उघडणार याकडे लक्ष लागले आहे.

---------

पूजा, अर्चना, मंदिर परिसराची झाडलोट, दिवाबत्ती करणे तसेच सामान्य भाविकांना पूजा, प्रार्थना, अभिषेक करता यावा म्हणून सकाळी ७ ते ११ आणि सायंकाळी ५ ते ७ या वेळेत नियमांच्या अधीन राहून सर्व मंदिरे उघडावीत. भाविकांनी कळसाचे दर्शन कुठवर घ्यावे? मंदिरात ध्वनिक्षेपकाद्वारे पूजा करण्यास प्रशासनाने परवानगी द्यावी. - जयसिंह चुंगडे, बीड.

------

हिंदू देेवस्थानचे दरवाजे सर्वांकरिता निर्बंध लावून खुले करावेत. आमचे मंदिर आमची श्रद्धा आहे. कोरोनाचा संसर्ग टाळण्यासाठी मंदिर व्यवस्थापन समिती व भाविक समन्वयाने करतील. शासन, प्रशासनाने भक्तांच्या भावना लक्षात घ्याव्यात. - शिवाजी जाधव, बीड.

-----------

सरकारने मंदिर सुरू करणे गरजेचे आहे. पुजाऱ्यांची उपासमार होत आहे. अभिषेक, संकल्प, दक्षिणा, कालसर्पशांती, अन्नशांती बंद असल्याने उत्पन्नाचा स्रोत खालावला आहे. बाहेरचे भाविक, पर्यटक मंदिर पाहण्यासाठी व माहिती जाणून घेण्यासाठी येतात. त्यांचेही येणे सध्या बंद आहे. मंदिरे सुरू करावीत म्हणून आम्ही मुख्यमंत्र्यांना निवेदन पाठविले आहे. मंदिरे सुरू करण्याची गरज आहे.

-- संजय गुरव, पुजारी, कंकालेश्वर मंदिर, बीड.

--------------

पूजेसाठी पानफूल, बेलफूल, हार, उद्बत्ती, नारळ विक्रीतून कसेतरी उत्पन्न मिळत होते. या व्यवसायातून आत्मिक आनंद मिळत होता. सोळा महिन्यांपासून मंदिर बंद असल्याने पर्याय शोधवा लागला. - चंद्रकांत एडके, बीड.

------

मंदिरे बंद असल्याने हारफुले विकत नाहीत. सार्वजनिक कार्यक्रमही बंद आहेत. त्यामुळे फूलविक्रेत्यांना आर्थिक फटका सहन करावा लागत आहे. मंदिरे सुरू झाली तर आमच्यासह मंदिरात पूजनासाठी लागणाऱ्या साहित्य विक्रीच्या व्यवसायांला आधार मिळेल. - राजू घाडगे, बीड.

===Photopath===

200621\img_20210620_142647_14.jpg