परळीचा सौरभ नावंदे दिल्लीत राष्ट्रीय युवा पुरस्काराने सन्मानित

आंतरराष्ट्रीय युवा दिनाच्या औचित्याने केंद्रीय कल्याण व क्रीडा मंत्रालयाच्या वतीने विज्ञान भवन, नवी दिल्ली येथे आयोजित कार्यक्रमात केंद्रीय युवक व कल्याण व क्रीडामंत्री अनुराग ठाकूर यांच्या हस्ते २०१७-१८ व २०१८-१९ च्या राष्ट्रीय युवा पुरस्काराचे वितरण करण्यात आले. यावेळी केंद्रीय मंत्रालय सचिव उषा शर्मा व संयुक्त राष्ट्रसंघाच्या भारतातील निवासी समन्वयक डियर्ड बायोडड उपस्थित होत्या.

या कार्यक्रमात सन २०१७-१८ साठी १४ व २०१८-१९ साठी ८ अशा २२ पुरस्कारांचे वितरण करण्यात आले. यात सौरभला सन २०१७-१८ च्या राष्ट्रीय युवा पुरस्कार रु. एक लाख, पदक व प्रमाणपत्र देऊन गौरविण्यात आले. सौरभ नावंदे याने २०१७ मध्ये क्वालालंपूर येथे आयोजित 'राष्ट्र मंडल युवा शिखर संमेलना’त आणि २०१८ मध्ये न्यूयॉर्क येथे आयोजित संयुक्त राष्ट्रसभेत भारताचे प्रतिनिधित्व केले. त्याला महाराष्ट्र शासनानेही यापूर्वी यूथ आयकॉन पुरस्काराने सन्मानित केले आहे.

दरम्यान, महाराष्ट्र सदन, नवी दिल्ली येथे सौरभने महाराष्ट्र राज्याचे राज्यपाल भगतसिंह कोश्यारी यांची भेट घेतली. त्यावेळी त्यांनी सौरभचे अभिनंदन केले. तसेच भाजपच्या राष्ट्रीय सचिव तथा माजी मंत्री पंकजा मुंडे, बीड जिल्ह्याचे पालकमंत्री धनंजय मुंडे, केंद्रीय अर्थराज्यमंत्री डॉ. भागवत कराड, खासदार प्रीतम मुंडे यांच्यासह अनेकांनी सौरभचे अभिनंदन केले.

सौरभ हा सेवानिवृत्त क्रीडाधिकारी सुभाष नावंदे व औरंगाबाद जिल्हा क्रीडाधिकारी कविता नावंदे यांचा मुलगा असून, प्रेस फोटोग्राफर भीमाशंकर नावंदे व आदर्श शिक्षक अशोक नावंदे, सामाजिक कार्यकर्ते रामलिंगअप्पा नावंदे यांचा तो पुतण्या आहे.

170821\17_2_bed_10_17082021_14.jpeg

परळीचा सौरभ नावंदे यास दिल्लीत राष्ट्रीय युवा पुरष्काराने सन्मानित करण्यात आले.